John Giannandrea anuncia a súa retirada de Apple

Apple anunciou unha profunda reestruturación na súa división de intelixencia artificial tras confirmarse que John Giannandrea, vicepresidente sénior de Machine Learning e Estratexia de IA, deixará o cargo e pasará a exercer como asesor antes de retirarse na primavera de 2026. A compañía tamén confirmou a incorporación do investigador Amar Subramanya como novo vicepresidente de IA, quen dependerá directamente de Craig Federighi.
A chegada de Subramanya, tras un breve paso por Microsoft e cunha longa traxectoria previa en Google, supón un reforzo decisivo na estratexia dos Apple Foundation Models, na investigación en aprendizaxe automática e nas áreas de seguridade e avaliación de IA. O resto das funcións que ata agora dependían de Giannandrea pasarán a integrarse baixo a responsabilidade de Sabih Khan e Eddy Cue, coa intención de achegar estas actividades a organizacións de perfil similar dentro da empresa.
Dende a súa incorporación en 2018 procedente de Google, Giannandrea tivo un papel determinante na definición da estratexia de IA de Apple, aínda que a nivel de produto este camiño foi considerado infrutuoso, polo que este mesmo ano tivo que ceder parte das súas responsabilidades a Mike Rockwell. Liderou o desenvolvemento de tecnoloxías clave e consolidou un equipo responsable dos Apple Foundation Models, da busca e xestión do coñecemento, da investigación en aprendizaxe automática e da infraestrutura de IA.
Subramanya chega cunha ampla experiencia tanto na investigación como na integración destas tecnoloxías en produtos de consumo. En Microsoft exerceu como vicepresidente corporativo de IA apenas 5 meses e, antes diso, pasou 16 anos en Google, onde foi responsable de enxeñaría do asistente Gemini.
Tim Cook, CEO de Apple, agradeceu o labor desenvolvido por Giannandrea e salientou a importancia da súa achega: «Estamos agradecidos polo papel que John desempeñou na construción e no avance do noso traballo en IA, axudando a que Apple siga innovando e mellorando a vida dos nosos usuarios». Sobre a incorporación de Subramanya, Cook subliñou: «A IA leva moito tempo no centro da estratexia de Apple, e agradécenos dar a benvida a Amar ao equipo de Craig e incorporar a súa extraordinaria experiencia en IA». Ademais, lembrou o papel de Federighi na evolución da compañía neste ámbito, incluído o desenvolvemento dunha Siri máis personalizada prevista para o vindeiro ano.
Con esta remodelación, Apple busca acelerar o ritmo de innovación e reforzar o seu compromiso cunha IA máis persoal, fiable e orientada ao usuario. A marcha progresiva de Giannandrea, a maior responsabilidade de Federighi e a experiencia técnica de Subramanya conforman, segundo a compañía, a base dun novo capítulo na estratexia de intelixencia artificial de Apple.