LaLiga persegue aos usuarios de Ace Stream

Nos últimos días están a transcender o envío de cartas por parte de LaLiga a usuarios que supostamente estarían a ver retrasmisións deportivas de xeito ilegal a través de Ace Stream, actuacións que non terían nada que ver coa iniciativa contra o cardsharing da tempada anterior, senón que desta volta a Liga Nacional de Fútbol Profesional estaría habilitada xudicialmente para solicitar aos principais operadores a identificación de enderezos IP conectados a Ace Stream.
Falamos dun auto do Xulgado do Mercantil nº 9 de Barcelona, con data do 18 de xullo, no que LaLiga recibe a autorización para solicitar a Vodafone, MasOrange, Digi e Telefónica durante a tempada de fútbol 2024/25 os datos identificativos dos titulares das liñas que detectasen participando nas canles espello de Ace Stream. A listaxe de enderezos IP que solicitaría LaLiga pode actualizarse con periodicidade semanal até o remate da tempada de fútbol.
Ante a publicación desta información podemos entender que nos vindeiros meses veremos moitas reclamacións realizadas por parte de LaLiga para disuadir aos usuarios finais a consumir fútbol pirata a través de Ace Stream.