Microsoft ofrece a tecnoloxía de ChatGPT a través dunha nova aplicación para Android

martes, 26 de decembro do 2023 Marcus Fernández

Microsoft vén de estrear unha aplicación móbil para Android chamada Microsoft Copilot, que como ben deixa caer o seu nome, trátase do asistente de chat promovido por intelixencia artificial que busca contribuír á mellora da produtividade. Esta aplicación de balde funciona empregando os últimos modelos de OpenAI (GPT-4 e DALL·E 3) polo que é un xeito moi atractivo de empregar esta tecnoloxía sen ter que pasar por caixa.
Microsoft Copilot permítenos conversar para obter respostas rápidas, complexas e precisas, servindo tamén para crear impresionantes imaxes a partir de simples descricións de texto e para escribir rapidamente contido en función das instrucións que deamos.
Até o momento Microsoft xa achegaba estas funcionalidades a través da aplicación de Bing, pero finalmente optou por ofrecer o asistente a través dunha aplicación de seu, que está prevista que en breve chegue tamén a iOS.

PUBLICIDADE