Nova prórroga para TikTok nos EE.UU.

Tras a toma de posición da presidencia dos EE.UU., Donald J. Trump asinou unha orde executiva de legalidade moi discutible na que se instaba a non aplicar a prohibición vixente dende o día anterior da plataforma social TikTok nos EE.UU., contradicindo os mandatos xudiciais.
Trump establecía un prazo de 75 días para buscar unha solución á situación de TikTok que resultase favorable para os EE.UU., e na que ByteDance debía vender o seu negocio a unha empresa estadounidense, algo que dende o Goberno da China non aceptan (sendo a súa aprobación imprescindible para unha operación de tal calado).
Os 75 días da prorroga establecida por Trump están a piques de rematar, e ante a falla de acordo, o presidente publicou en Truth Social un comunicado asegurando que fixeron moitos progresos para salvar TikTok, pero non foron quen de formalizar ningún acordo, polo que asinará unha nova orde executiva para dar outros 75 días de prazo. Trump asegura que os aranceis que aprobou estes días puideron ter afectado ás negociacións, aínda que apunta que segue comprometido con manter TikTok nos EE.UU.
Varios senadores demócratas levan un tempo advertindo de que unha nova prórroga para TikTok sería problemática, por situar as empresas nunha posición de inseguridade xurídica, xa que «a prórroga unilateral de Trump é ilegal e forza ás compañías tecnolóxias unha vez máis a decidir entre o risco de asumir unha responsabilidade legal ruinosa ou bloquear o acceso a TikTok».