O CITIC acollerá unha conferencia do experto en IA Paul Van Branteghem

Paul Van Branteghem, experto en Intelixencia Artificial, será o relator da segunda charla do ciclo HumanIA organizado polo Consello Social da Universidade da Coruña e a Facultade de Humanidades, en colaboración co CITIC. Esta segunda cita celebrarase na Sala Cloud do dito centro de investigación coruñés o vindeiro xoves 9 de novembro ás 17.30.
A influencia da Intelixencia Artificial no mercado laboral e os sectores relacionados coas ciencias sociais son os eixos centrais desta segunda entrega do ciclo de charlas. Van Branteghem impartirá a conferencia ChatGPT e outras aplicacións: casos de uso no mercado laboral no que falará sobre como a IA está cada vez máis presente nas empresas españolas, e tamén do papel que xogan ferramentas como ChatGPT, GPT-4, BERT e DALL·E 2 na reconfiguración dos postos de traballo.
Paul Van Branteghem é físico con mestrado en Intelixencia Artificial Avanzada e en Meteoroloxía combinado con posgraos en Marketing Analytics. É co-fundador de Big Onion Tech e a asociación Spain-AI. Traballou en Siemens-Gamesa e en BBVA desenvolvendo proxectos relacionados coa IA e en StratioBD e Deloitte liderando proxectos de Data Science.
A asistencia ao ciclo é previa inscrición e as prazas están esgotadas.