O CITIC e ASPACE crean un grupo de traballo para a rehabilitación de persoas con parálise cerebral

O Centro de Investigación TIC (CITIC) e a Confederación ASPACE veñen de dar forma a un grupo de traballo para definir contidos informáticos que melloren a avaliación e o desenvolvemento de programas de rehabilitación de persoas con parálise cerebral. Ao fío desta iniciativa, visitou a sede do CITIC no Campus de Elviña (UDC, A Coruña) o grupo de traballo de ASPACE, formado polo fisioterapeuta Rubén Carneiro, a logopeda Mirian Piñeiro, a informática María José Pérez e a terapeuta ocupacional Aroa Fernández.
O grupo, acompañado polo subdirector do CITIC Javier Pereira, puido coñecer (a través da sala de demostradores do CITIC) algúns exemplos das posibilidade ofrecen os sistemas de Realidade Virtual e robótica para impulsar a autonomía dos colectivos que representa a confederación, a través dunha intervención directa con aqueles.
O CITIC e ASPACE definiron unha axenda de traballo para os vindeiros seis meses na que se contará coa participación de usuarios e o desenvolvemento de pequenos retos que permitan, con fins terapéuticos, mellorar a calidade de vida das persoas con parálise cerebral.