O CITIC lanza axudas para financiar proxectos de colaboración de investigadores novos
mércores, 16 de maio do 2018
O
Centro
de Investigación TIC (CITIC) do Campus da Coruña vén de lanzar
unha convocatoria para financiar proxectos de investigación
dirixidos por investigadores novos do propio centro. Os proxectos
a impulsar deberán cumprir unha serie de requirimentos, segundo
explica o CITIC. Para comezar, terán que ser desenvolvidos no
período 2018-2019 e ser iniciativas multidisciplinares nas que se
dea colaboración entre os grupos do CITIC e nos que participen
precisamente investigadores novos (con vencellos non permanentes á
Universidade da Coruña).
Ademais,
cada proxecto estará formado por un mínimo de dous grupos de
investigación e un máximo de catro. Respecto do financiamento,
achegarase un máximo de 6.500 euros para cada iniciativa na
anualidade 2018 e cun máximo de 2.000 euros para a anualidade 2019,
cun gasto máximo do 60% para cada un dos proxectos individuais que o
compoñen.
A
memoria de solicitude e demais documentación complementaria deberase
enviar por correo electrónico ao enderezo
proyectos.idi@citic-research.org antes das 14:00 horas do día 20 de
maio de 2018.
Esta
iniciativa enmárcase nunha das accións establecidas no Plan
Estratéxico do CITIC para o período 2017-2021 no seu Eixo de
Investigación. A través da mesma, preténdese estimular a
investigación cooperativa entre os mozos investigadores dos
distintos grupos de investigación, “axuntando esforzos e buscando
sinerxías e capacidades complementarias”, así como o intercambio
de recursos e coñecementos de maneira que se poidan abordar
cuestións complexas relacionadas.