O CPEIG e Igualdade redobrarán o seu traballo contra a fenda dixital de xénero

O presidente do Colexio Profesional de Enxeñaría en Informática de Galicia (CPEIG), Fernando Suárez Lorenzo, e a secretaria xeral de Igualdade da Xunta de Galicia, Susana López Abella, celebraron o pasado día 23 de marzo unha xuntanza co obxectivo de afrontar de maneira conxunta actividades para combater a fenda dixital de xénero en calquera das súas manifestacións: a fenda dixital que separa no plano formativo ámbolos sexos, a que obstaculiza o manexo das TIC no rural, a que impide visualizar o labor das mulleres na informática e nas empresas TIC, a que reduce cada ano a cifra de rapazas que apostan por estudos ligados ás novas tecnoloxías, etc.
Segundo o acordado na reunión, o programa Rede Emprende en Igualdade reeditarase en 2015 ao tempo que “incrementará o número de concellos e mulleres beneficiadas”, explicaron. Trátase dunha iniciativa que nace froito da colaboración entre o Colexio, a Secretaría Xeral de Igualdade da Xunta de Galicia e a Axencia para a Modernización Tecnolóxica de Galicia (AMTEGA) a prol da capacitación tecnolóxica das mulleres.
Segundo fixeron saber, “Emprende en Igualdade ofrecerá este ano, na súa terceira edición, unha serie de cursos que comprenden actuacións de asesoramento, apoio e formación dirixidas ás mulleres potencialmente emprendedoras, na procura de emprego ou con arelas de formarse”. O obxectivo, engadiron, “é axudalas na posta en marcha ou modernización das súas empresas e na procura de emprego para fomentar a súa adaptación e a concorrencia no mercado actual”.
As colexiadas e colexiados do CPEIG encargaranse de impartir formación e asesoramento en varios aspectos: iniciación a Internet e redes sociais; novas tecnoloxías e emprendemento; novas tecnoloxías e busca de emprego, e redes e transposición de experiencias.
Na xuntanza, a secretaria xeral de Igualdade comunicou a Fernando Suárez a súa intención de apoiar, coma en edicións anteriores, a Noite da Enxeñaría en Informática de Galicia a través do patrocinio do premio Ada Byron, que salienta a traxectoria profesional dunha muller enxeñeira en Informática. Amais disto, na reunión púxose sobre a mesa a necesidade de traballar máis para conseguir que as mozas galegas aposten por carreiras de Enxeñaría en Informática.