O CiTIUS afiánzase internacionalmente cun proxecto para levar Big Data a Asia Central
xoves, 27 de febreiro do 2020
O
Centro Singular de Investigación en Tecnoloxías Intelixentes
(CiTIUS) da USC vén de dar un novo e relevante paso para afianzar a
súa presenza no mundo. E faino a través do proxecto ELBA
(Establishment of training and research centers and course
development on Intelligent Big Data Analytics in Central Asia),
que estará liderado durando os vindeiros tres anos polo profesor da
universidade compostelá David E. Losada (adscrito ao CiTIUS),
acompañado nesta andaina por Paula López e Tomás Fernández, tamén
do dito centro, e do Servizo de Relacións Exteriores da USC.
O
proxecto ELBA, no que participa un consorcio de medio cento de
institucións de Europea e Asia Central, contribuirá a mellorar a
capacitación de investigadores dos dous continentes no ámbito da
análise de grandes cantidades de datos, o que se coñece
familiarmente como Big Data.
O
novo proxecto, que arrincou oficialmente este xoves 27 de febreiro
coa xuntanza de lanzamento de ELBA na ETSE (Escola Técnica Superior
de Enxeñaría da USC), estará en vigor ata finais de 2022 e disporá
dunha dotación orzamentaria próxima ao millón de eu.
En
termos máis concretos, o CiTIUS explica que ELBA ten o obxectivo de
“profundar no desenvolvemento de novas competencias en tecnoloxías
que contribúan a mellorar o Big Data Analytics, o paradigma
de Intelixencia Artificial (IA) para o tratamento de inxentes
cantidades de datos”.
A
relevancia da iniciativa é aínda maior, explica o centro
compostelán, se temos en conta as respostas que se esperan obter a
curto e medio prazo do Big Data:
as respostas a todo tipo de interrogantes, desafíos e retos
científicos, investigadores e empresariais de gran complexidade, até
agora difíciles de abordar pero cada vez máis asumíbeis co avance
das tecnoloxías de cálculo e análise (Machine Learning, Deep
Learning, etc). Neste punto, ELBA é un proxecto que quere
achegar capacitación en Big Data onde até o de agora non
existe ou está en proceso de desenvolvemento.
“Este
proxecto é unha oportunidade para fortalecer as ligazóns con outras
institucións europeas e de Asia Central nun eido tan punteiro como o
do Big Data Analytics”, afirma o profesor Losada, engadindo
que ELBA tamén busca “definir unha axenda para a mellora nas
capacidades dos socios de Asia Central na formación e investigación
en tecnoloxías de tratamento da información a gran escala, así
como noutras tecnoloxías relacionadas”, explica.
Xunto
a USC, institución coordinadora do proxecto, participan tamén
outros dous socios europeos (Politécnico de Turín e Universidade de
Primorska) e dez institucións de Asia Central, repartidas entre
Usbequistán, Kazajistán, Kirguizistán e Tadxiquistán. As tarefas
da USC estarán orientadas a mellorar a capacidade formativa dos
socios da dita contorna xeográfica, facer seguimento e asesorar o
desenvolvemento de plans de estudo en Big Data Analytics e
proporcionar métodos e ferramentas de aprendizaxe en tecnoloxías
intelixentes de procesado de datos masivos.
Socios
do proxecto
Politécnico
de Turín (Italia), Univerza na Primorskem universita do litorale
(Koper, Eslovenia), Ao-xorazmiy Nomli Urganch Davlat Universiteti
(Urgench Khore, Usbequistán), Bukhara Engineering Technological
Institute (Bukhara, Usbequistán), International University of
Information Technologies (Almati, Kazajistán), Kulob Institute of
Technology and Innovation Management (Kulob, Tadxiquistán), Kyrgyz
State Technical University Named after I. Razzakov (Bishkek,
Kirguizistán), Osh Technological University (Osh, Kirguizistán),
Republican State Enterprise Operating under the right of Economic
Management A. Baitursynov Kostanay State University (Kostanay,
Kazajistán), Tashkent Institute of Design, Construction and
Maintenance of Automotive Roads (Tashkent, Usbequistán),
Technological University of Tajikistan (Dushanbe, Tadxiquistán),
Toshkent Shahridagi Turin Politexnika Universiteti (Tashkent,
Usbequistán).