O CiTIUS e Balidea presentan o prototipo de Smart Cardia, a plataforma que marca un antes e un despois na rehabilitación cardíaca

xoves, 25 de marzo do 2021 S. P.

Este 25 de marzo fíxose balance do conseguido ao abeiro do proxecto galego Smart Cardia, que tiña por obxectivo crear tecnoloxías para facilitar a xestión da rehabilitación cardíaca. O prototipo resultante, xa rematado, foi un dos eixes temáticos da presentación deste xoves, na que participaron investigadores do CiTIUS e Balidea, que fixeron saber que a plataforma xa foi validada polo equipo de Rehabilitación Cardíaca do Complexo Hospitalario Universitario de Santiago (CHUS).
Os resultados de Smart Cardia, plataforma que incorpora tecnoloxías baseadas en Intelixencia Artificial (IA) para a xestión clínica do proceso de rehabilitación cardíaca en pacientes que sufriran un infarto agudo de miocardio, presentáronse este 25 de marzo en convocatoria virtual.
O proxecto, co-financiado pola Axencia Galega da Innovación (GAIN) a través do programa Conecta PEME, foi desenvolvido polo CiTIUS e a empresa Balidea baixo o asesoramento de cardiólogos do CHUS, como o doutor Carlos Peña, que liderou a definición e o desenvolvemento desta iniciativa.
Ao longo deste ano culminou a elaboración dos seis módulos que integran a plataforma: módulo de xestión intelixente, módulo de interfaces gráficas, módulo de interacción intelixente, módulo de xeración automática de informes, módulo de gamificación de plans de saúde, e módulo de predición de impacto do programa nos pacientes. Asemade, acometeuse a integración das distintas partes e a validación do conxunto no marco do programa de rehabilitación cardíaca.
Trátase dun proxecto de investigación levado a cabo polo consorcio de empresas liderado pola compañía Balidea (líder do proxecto), no que tamén participan Imagames (spin-off do CiTIUS) e SM Tecno, ademais do propio CiTIUS (USC) e a Fundación IDIS (SERGAS).
Da benvida á presentación en convocatoria virtual encargouse Maria del Carmen López, responsábel da área de I+D+i de Balidea; e da súa moderación, Rocío Mosquera, presidenta do CSG e xerente de Galaria.
Interviñeron na presentación tamén o doutor Carlos Peña Gil, membro da Fundación IDIS e responsábel do programa de rehabilitación cardíaca do CHUS (Sergas), que salientou “como a dixitalización contribúe a mellorar o proceso de rehabilitación cardíaca”.
Pola súa banda, José Gandarela, técnico do proxecto na área de I+D+i de Balidea, explicou o resultado final da ferramenta intelixente de soporte ao proceso de rehabilitación cardíaca.
O catedrático Alberto Bugarín, investigador vinculado ao CiTIUS, centrou a súa intervención na tecnoloxía Data2Text, a Intelixencia Artificial usada no proxecto para a xeración automática de informes en linguaxe natural; o doutor Manuel Lama, tamén adscrito ao CiTIUS, falou da tecnoloxía baseada en Intelixencia Artificial que incorpora a plataforma, que é capaz de predicir o grao de beneficio que obterán os pacientes co programa de rehabilitación.
Javier López, de Imagames, debullou as posibilidades da gamificación para a optimización de procesos; e finalmente, Víctor Souto, de SM TECNO, dedicou a súa intervención a abordar a temática das interfaces intelixentes.
Rehabilitación cardíaca controlada, segura e de calidade
A finalidade do proxecto Smart Cardia foi desenvolver unha plataforma que facilitase aos profesionais sanitarios a xestión do proceso de rehabilitación cardíaca, integrando compoñentes intelixentes e preditivos e interfaces gráficas cun maior grao de usabilidade. Convértese así, en palabras do CiTIUS e Balidea, “nunha ferramenta idónea para a posta en marcha de programas de rehabilitación cardíaca, permitindo que, desde o primeiro día, os profesionais sanitarios traballen no marco dun proceso seguro e predicíbel, sen variabilidade e controlado, contando ademais con indicadores de calidade”. Tamén puxeron o foco nun dos grandes obxectivos: é unha plataforma pensada como apoio aos profesionais sanitarios que interveñen neste tipo de procesos, como cardiólogos, persoal de enfermaría especializada, fisioterapeutas, médicos rehabilitadores, endocrinólogos, médicos de atención primaria e enfermería comunitaria.

PUBLICIDADE