O CiTIUS inaugura as xornadas sobre medicamento e Intelixencia Artificial
mércores, 10 de novembro do 2021
O
Aulario Novoa Santos do Hospital Clínico de Santiago de Compostela
acolle hoxe, a partir das 16.00 horas, a
primeira das dúas xornadas do evento Intelixencia Artificial en
Medicamento: das implicacións ás aplicacións. Trátase dun
cita tecnolóxica organizada polo CiTIUS (Centro Singular de
Investigación en Tecnoloxías Intelixentes) da USC e o IDIS
(Instituto de Investigación Sanitaria de Santiago), directamente
encamiñada a pór de relevo as cousas que poden facer no ámbito
sanitario as ferramentas con capacidade de analizar e xestionar
información, comunicarse e tomar decisións. O evento, patrocinado
polo xigante tecnolóxico Microsoft, terá a súa continuidade o 17
de novembro de 2021.
As
xornadas estrutúranse en distintos paneis temáticos interactivos,
“cun enfoque multidisciplinar e nun formato híbrido”, que
integrará tanto asistentes presenciais como a distancia, explican
fontes do CiTIUS, engadindo que o programa inclúe diversas
aproximacións aos fundamentos da IA e, tamén, a algunhas
aplicacións de uso común.
As
xornadas teñen a súa orixe na necesidade de abrirnos camiño na
Intelixencia Artificial (IA) que é xa “a tecnoloxía cun maior
potencial transformador das que se desenvolveron até a data”. O
seu papel, salienta o CiTIUS, “resulta esencial en múltiples
ámbitos da nosa vida diaria, intervindo en todos os sectores de
actividade, entre eles o eido do medicamento, cuxo futuro pasa por
unha incorporación constante dos avances tecnolóxicos”. Entre
estes avances sitúase por exemplo a aprendizaxe automática (Machine
Learning), que permite xa en moitos casos realizar diagnósticos
con gran precisión, así como detectar patoloxías con escasas
marxes de erro. “O tándem formado polas tecnoloxías intelixentes
e os especialistas nas distintas disciplinas médicas será unha
garantía de progreso no porvir do medicamento”, explica o CiTIUS.