O CiTIUS lanza nas Cancelas un convite ás nenas e mozas a apostaren pola tecnoloxía

venres, 11 de febreiro do 2022 S. P.

Coincidindo coas celebracións deste 11 de febreiro, Día das Mulleres e as Nenas na Ciencia, o Centro Comercial As Cancelas de Santiago acollerá desde este venres unha mostra de 9 investigadoras do eido da tecnoloxía en distintas fases da súa carreira, que reflexionan sobre o seu papel como mulleres e científicas do CiTIUS (Centro Singular de Investigación en Tecnoloxías Intelixentes da USC). As súas mensaxes, sinala o centro, están dirixidas a nenas e rapazas de tódalas idades. O obxectivo: mostrarlles as vantaxes, posibilidades e beneficios de elixiren unha carreira STEM.
A exposición #SomosQuen: científicas preto de TI vén da man do Centro Singular de Investigación en Tecnoloxías Intelixentes da Universidade de Santiago de Compostela (CiTIUS) en colaboración co Centro Comercial As Cancelas.
A mostra, de acceso libre e aberta a todo tipo de públicos, está especialmente dirixida ao alumnado feminino máis novo, e poderase visitar no andar baixo do centro comercial entre a apertura e o peche das instalacións, desde as 11:00 deste venres ata última hora da tarde do xoves 17 de febreiro.
O obxectivo desta iniciativa é duplo: por unha banda, servir de inspiración e contribuír a espertar novas vocacións investigadoras entre as nenas e rapazas que aínda non decidiran o seu futuro académico; por outro, a mostra trata tamén de promover e divulgar o labor científico desenvolvido polo CiTIUS como centro de investigación de referencia, poñendo especialmente en valor o papel da muller no ámbito da tecnoloxía.
Paula López, directora adxunta do CiTIUS e unha das participantes da mostra, salientaba a importancia de aproveitar estas efemérides para mostrar e reivindicar o traballo que fan as investigadoras do centro: “a exposición pareceunos un bo xeito de levar a ciencia á rúa, unha idea atractiva e próxima coa que presentar o feito de ser muller e ser investigadora como algo natural”.
Ademais de Paula López, a mostra conta tamén coa participación das investigadoras Dora Blanco, Mariña Canabal, María José Carreira, Ledicia Díaz, Iria de Dios, Faranak Karimpour, Celia Outes, e Silvia Rodríguez.

PUBLICIDADE