O CiTIUS lanza un videopodcast multiplataforma para comunicar os seus achados ao mundo: Mentes Singulares
mércores, 22 de decembro do 2021
O
CiTIUS
da USC (Centro Singular de Investigación en Tecnoloxías
Intelixentes) vai rematar 2021 cunha nova iniciativa de divulgación
que pon o foco nun dos grandes ámbitos de actividade do centro: a
Intelixencia Artificial. Estamos a falar de Mentes
Singulares, un videopodcast multiplataforma producido
dende o CiTIUS e que xorde coa arela de “crear un espazo de opinión
e debate sobre cuestións relacionadas coas principais liñas
científicas do centro”, pondo de relevo o labor desempeñado polas
persoas que traballan nel.
O
podcast viu a luz recentemente cun primeiro programa sobre
supercomputación, que abre a tempada dando a benvida a un invitado
de honra: Mateo Valero, fundador e director do Barcelona
Supercomputing Center (BSCC-CNS) e un dos investigadores máis
reputados a nivel internacional no ámbito da computación de altas
prestacións.
“Trátase
dun formato que ano tras ano vai adquirindo máis e máis relevancia
nas canles dixitais”, afirman os seus creadores, engadindo que a
iniciativa alíñase co proceso de transformación e renovación do
CiTIUS cara a novos formatos e medios dixitais, buscando un contacto
máis estreito coa comunidade investigadora internacional e coa
cidadanía en xeral: “Cremos que era o momento de apostar por unha
imaxe máis coherente co contexto actual, dominado polas narrativas
transmedia e a linguaxe dixital”.
Mentes
Singulares non se limitará a afrontar só o reto de entreter ao
público interesado nas diferentes temáticas que se debaterán ao
longo da tempada (intelixencia artificial, deseño microelectrónico,
realidade aumentada, etc.), senón que aspira a converterse, a
maiores, “nun altofalante de prestixio para a comunidade
científica”.
Cunha
duración aproximada de entre 45 e 60 minutos, cada programa reunirá
facianas do centro xunto a persoas convidadas do mundo da ciencia, as
letras, a cultura ou o mundo da empresa. Os programas organizaranse
ao redor de temáticas relevantes relacionadas coas capacidades e
proxectos que levan a cabo no CiTIUS (aprendizaxe automática, computación de alto rendemento, eSaúde, etc) e darán pé ao debate e a reflexión sobre cuestións de actualidade de alto interese social.
Mentes
Singulares foi concibido como un produto
multicanle, polo que pode seguirse tanto desde a súa plataforma
orixinal de vídeo (YouTube)
como a través das principais plataformas de consumo de podcasts
(Spotify,
TuneIn, iVoox,
Google
Podcasts e Apple
podcasts).