O CiTIUS organiza en verán a nova edición da prestixiosa conferencia ECAI, que terá formato online

Galicia dará este verán un novo paso para converterse en país referente no ámbito das tecnoloxías con capacidade de analizar información, xestionala, comprendela e tomar decisións. Estamos a falar da celebración da 24 convocatoria da prestixiosa Conferencia Europea en Intelixencia Artificial, a ECAI, que se vai celebrar en formato online a partir do 29 de agosto e que contará co CiTIUS, o Centro Singular de Investigación en Tecnoloxías Intelixentes da Universidade de Santiago, como entidade organizadora. Por mor da COVID-19, será a primeira en que o congreso se celebre en formato dixital.
Os organizadores da 24ª European Conference on Artificial Intelligence (ECAI) confirmaron este 8 de xuño que o congreso científico bienal sobre tecnoloxías intelixentes, un dos máis sobranceiros do mundo na súa temática (e o máis prestixioso a nivel europeo), desenvolverase nas datas previstas (a finais de agosto), pero nun formato dixital.
“É a primeira vez que este congreso se realizará online nos seus case 50 anos de vida e será un evento histórico, con máis contidos e participación cá nunca”, sinalou o presidente do Comité Organizador do congreso, Senén Barro. O director científico do CiTIUS engadiu que a viraxe no formato do evento “terá un impacto moi positivo sobre o número de asistentes”, xa que, malia os atrancos derivados da pandemia, conseguirase pasar dunha cifra inicial dun milleiro de persoas, a varios milleiros.
Nesta nova convocatoria, o ECAI pasa a ser o congreso “Digital ECAI2020” e a mostrar unha feitura “máis innovadora, interactiva e con capacidade para axuntar contidos do máis alto nivel científico, con espazos expositivos e formativos, salas de debate e mesmo eventos sociais”.
Adaptarse ás circunstancias
Segundo explican fontes do CiTIUS, a organización tomou esta decisión tras “unha minuciosa análise da situación derivada da pandemia no mundo, co obxectivo de garantir a celebración da conferencia, pero sen as severas limitacións e riscos que suporía a súa organización presencial”. O CiTIUS lembra que “as tecnoloxías das que dispoñemos hoxe, algunhas delas propias mesmo do ámbito da Intelixencia Artificial, permitirannos organizar un congreso cunha participación que será varias veces maior á que esperabamos na súa versión presencial”.

Senén Barro, director científico do CiTIUS nunha imaxe de Andrés Ruíz

Nos vindeiros días e semanas iranse desvelando novidades sobre a nova edición, unha conferencia que acubillará importantes novidades que “sorprenderán gratamente á comunidade científica internacional e a todas as persoas e organizacións que se sumaron a ECAI2020”, explicou o CiTIUS.
Os contidos do congreso repartiranse entre o 29 de agosto e o 5 de setembro, nas franxas horarias mellor adaptadas á disparidade de fusos en todo o mundo.
Digital ECAI2020 contará con relatores da elite científica mundial en Intelixencia Artificial, cuxas charlas serán en directo. A presentación de traballos científicos (só un de cada catro artigos foi aceptado, dun total de máis de 1.500 propostas recibidas) consistirá nun vídeo pre-gravado polo autor, que poderá ser visualizado en calquera momento e dará lugar a un debate en directo a través de vídeo-conferencia, ademais dunha canle de texto (chat).
Finalizada a conferencia, Digital ECAI2020 permitirá o acceso indefinido e gratuíto aos seus contidos principais, en particular aqueles de carácter científico, en liña co compromiso da Asociación Europea de Intelixencia Artificial (EurAI), entidade que auspicia o congreso e que agrupa ás asociacións de IA dos distintos países de Europa.
O CiTIUS tamén informa que “en liña coa actividade habitual dos congresos presenciais”, Digital ECAI2020 contempla tamén a celebración de eventos sociais interactivos en vivo, nos que os asistentes terán ocasión de participar activamente. O programa incluirá unha xornada polo Camiño de Santiago, concertos musicais, un percorrido histórico pola Universidade de Santiago ou mesmo coñecer algúns dos pratos máis singulares da gastronomía galega a través dunha visita en vivo ao Mercado de Abastos, situado no casco antigo da cidade de Santiago de Compostela.