O Colexio de Enxeñeiros Industriais entregará na Coruña os Premios Galicia de Industria
martes, 6 de xuño do 2023
O
Colexio de Enxeñeiros Industriais de Galicia (ICOIIG) en
colaboración coa Asociación de Enxeñeiros Industriais de Galicia
(AIIG) entregará os galardóns da quinta edición dos Premios
Galicia de Industria o vindeiro venres, 16 de xuño, no Palacio da
Ópera da Coruña. Haberá seis categorías, ás que se presentaron
un total de 14 empresas. Nelas recoñécense as mellores
traxectorias, o fomento e implantación de boas prácticas no campo
da industria, así como as contribucións realizadas polos
profesionais ou entidades.
As
empresas premiadas nesta edición son: Repsol, que recibirá o Premio
á mellor innovación industrial polo Proxecto G-54. Complexo
Industrial A Coruña; Navantia, distinguida co Premio á mellor
actuación en industria conectada 4.0 transformación dixital
pola creación dun sistema dixital baseado nun xemelgo de planta;
Agroamb Prodalt S.L. co Premio á mellor actuación de
sustentabilidade, socialmente responsábel e
medioambiente por converter residuos en materias primas para
elaborar abonos, fertilizantes sustentábeis como alternativa aos
químicos; e Dooroti co Premio á startup industrial
con maior impacto ou crecemento pola creación dunha rede
colaborativa de prazas de aparcamento de alugueiro cando están
libres en varias cidades galegas. Tamén será premiado o enxeñeiro
industrial José Ramón Álvarez Arnau, galardoado pola Mellor
traxectoria profesional na industria e enxeñería tras máis de
50 anos colexiado ao ICOIIG e cunha extensa vida profesional como
enxeñeiro industrial, abarcando todos os eidos ao servizo da
Administración do Estado, da empresa privada, da oficina técnica
coa redacción de proxectos industriais de todo tipo, da
Administración de Xustiza como perito de parte e perito xudicial e
da formación.
Finalmente,
o xurado outorgou dúas mencións: unha Mención honorífica á
industria galega que recaeu no Grupo
Lence por “ter no seu ADN a innovación a través da que ofrecer
valor engadido á sociedade no seu conxunto e, en particular, ao
sector industrial galego”; e unha Mención Especial pola
“contribución ao desenvolvemento e implantación doutras
iniciativas industriais” á Autoridade Portuaria da Coruña pola
súa actuación no proxecto Porto exterior da Coruña: unha aposta
de futuro da Coruña Green port.
O
xurado estivo composto polos enxeñeiros industriais que integran as
xuntas reitoras do ICOIIG e da AIIG, encabezados por Francisco Pérez
Rivas, decano e presidente, así como por representantes das súas
delegacións provinciais. Nesta quinta edición quíxose poñer en
valor a transformación dixital, o respecto ao medio ambiente e a
innovación industrial.