O EIBG adxudicou a Altia un contrato para o desenvolvemento do seu Portal de Clientes

A empresa galega Altia European Services, con sede en Oleiros, asinou na recta final de 2024 un contrato co European Investment Bank Group (EIBG, composto principalmente polo EIB e o EIF) para desenvolver un Portal de Clientes do Grupo (PCG) común e integrado e, desta forma, ofrecer unha solución dixital para as interaccións e servizos con clientes, intermediarios financeiros, mandatarios e socios do EIBG. A duración do contrato esténdese ata finais de 2025.
En palabras de Altia, “o contrato permitiranos mobilizar a nosa experiencia na xestión de proxectos para institucións públicas europeas e incorporar varios equipos nas diferentes etapas do proxecto, incluídas tarefas como a a análise, a definición do percorrido do usuario, o deseño e a implementación final do portal utilizando a plataforma de desenvolvemento low-code OutSystems”.
O Banco Europeo de Investimentos (BEI) é a institución de préstamos a longo prazo da Unión Europea, propiedade dos seus Estados membro. Financia investimentos sólidos que poden contribuír á política da UE.
Como parte do BEI, o Fondo Europeo de Investimentos (FEI) apoia as pequenas e medianas empresas (PEME) europeas facilitándolles un mellor acceso ao financiamento en forma de instrumentos de financiamento de débeda e investimentos de capital, que se despregan a través dos seus intermediarios financeiros en toda Europa.
Altia lembra que ambas as institucións teñen a súa sede en Luxemburgo, pero contan cun alcance europeo/global segundo as súas prioridades e proxectos de financiamento.
O BEI identificou a posta en marcha do seu Portal de Clientes como un piar clave da súa estratexia de transformación dixital.