O asistente virtual sobre cooperativismo lanzado dende a UVigo obtén un recoñecemento estatal

xoves, 25 de febreiro do 2021 S. P.

O labor dos investigadores de Ecobas (UVigo) María José Cabaleiro Casal e Carlos Iglesias Malvido, responsábeis da posta en marcha do asistente virtual sobre cooperativismo coñecido como SAVES, vén de ser distinguido pola Escola de Estudos Cooperativos da Universidade Complutense de Madrid. Concretamente, o seu sistema asistente virtual recibiu o X Premio á investigación e docencia en materia de organizacións de participación, na modalidade de mellor investigación na área de economía e outras afíns.
Como lembraremos, a ferramenta SAVES permite acceder á información vía web sobre a situación e evolución recente do cooperativismo en Galicia, así como do perfil económico-financeiro das cooperativas galegas e conta con potencial para estenderse a outras rexións xeográficas no contexto dos observatorios sobre economía social.
Para María José Cabaleiro e Carlos Iglesias este galardón é unha “gran satisfacción”, xa que o premio é outorgado por unha institución académica formada por expertos nacionais e internacionais adcada ao estudo e investigación do cooperativismo e as empresas de participación e, polo tanto, coñecedores das dificultades que implica investigar sobre cooperativas. “Calquera que vexa a páxina web pensará que detrás de Saves só hai un traballo informático, consistente en transformar táboas de datos en gráficos. Non obstante, ese é o aspecto que ten menos valor”, salientan os investigadores.
Máis detalles
SAVES, Sistema de Asistencia Virtual para o Cooperativismo e a Economía Social, é, en termos máis concretos, un asistente virtual para acubillar a información máis relevante do movemento cooperativo galego, “centralizada nun único espazo e accesible a golpe de clic”, que pretende ser unha ferramenta de traballo para todos os axentes implicados na economía social en xeral.
Desta maneira, “fronte á dispersión en fontes estatística diversas que presenta a día de hoxe a información sobre cooperativismo en Galicia e á ausencia dunha serie histórica con datos comparábeis no tempo”, SAVES ten o obxectivo de publicar progresivamente os seus resultados a través dunha aplicación web.
O asistente virtual desenvolvido polos investigadores de Ecobas estará a disposición de todo o público no referido a información básica e non protexida, mentres que aos informes terán acceso as cooperativas; a administración pública, especialmente a Subdirección Xeral de Economía Social; as principais asociacións do sector: AGACA e Espazocoop; e o persoal investigador das tres universidades galegas.
SAVES conta co co-financiamento da agrupación estratéxica Ecobas da Universidade de Vigo e das entidades da Rede Eusumo, en particular da Subdirección Xeral de Economía Social, dependente da Consellería de Emprego. Colaboran ademais as unións de cooperativas galegas Espazocoop e AGACA e a Escola de Estudos Empresariais de Vigo, “que estivo con nós desde o inicio desta idea, pondo a nosa disposición os seus espazos e a súa desinteresada colaboración”, destacaba Cabaleiro na súa presentación.

PUBLICIDADE