O conselleiro de Economía visita as instalacións de Cinfo no CITIC
venres, 5 de abril do 2019
Cinfo,
a empresa tecnolóxico-audiovisual galega responsábel de Tiivii (a
revolucionaria tecnoloxía de televisión intelixente que é quen de
seguir os protagonistas dun espectáculo e crear o directo de maneira
automática, botando man de tecnoloxías de Intelixencia Artificial),
recibiu
hoxe a visita do conselleiro de Economía, Francisco Conde, a quen
lle foron mostradas as principais solucións da firma (con sede
no Centro de Investigación TIC da UDC, o CITIC) en materia de
aprendizaxe das máquinas, 5G, Internet das Cousas, produción
automática e análise de información a gran escala (Big Data).
Na
súa estadía, Conde tivo oportunidade de ver como encaixan as ditas
contribucións de Cinfo aos ámbitos do audiovisual, a Industria 4.0
ou a aeronáutica non tripulada. O conselleiro estivo acompañado do
director executivo da empresa, Antonio Rodríguez del Corral, o
reitor da UDC, Julio Abalde, o vicerreitor de Política Científica,
Investigación e Transferencia, Salvador Naya, e o director do CITIC,
Manuel F. González Penedo.
Durante
o encontro, Conde puido manter varias reunións co equipo directivo
de Cinfo, que lle explicou os plans de futuro da compañía. Ademais,
tivo oportunidade de coñecer en detalle algúns dos proxectos
sobranceiros que Cinfo está a desenvolver na actualidade, como o
sistema multicámara embarcado e de ortorrectificación en tempo
real, englobado na iniciativa para o emprego de sistemas aéreos non
tripulados (UAV) no ámbito civil e na mellora da prestación de
servizos públicos, impulsado pola Xunta de Galicia. Segundo informou
Cinfo, estes sistemas permiten a adquisición, procesado, gravación
e transmisión de vídeo dende aeronaves (drones e helicópteros) en
pleno voo para coñecer en todo momento, ou consultar baixo demanda,
o que acontece durante unha misión.
Cinfo
tamén mostrou a súa experiencia referencial en sistemas de
seguimento automático de deportes e eventos baseados en Intelixencia
Artificial, que posibilitan a realización automática de vídeo na
nube. Segundo fixo saber o seu director executivo, “a súa
implantación optimiza o traballo dos equipos técnicos de televisión
e reduce os custos de produción, pero non só ten vantaxes para o
sector audiovisual, senón que tamén permitirá a calquera club
deportivo, con independencia do seu tamaño, obter máis ingresos dos
seus patrocinadores ou directamente dos seus seareiros”. Amais,
engadiu, que “coa solución de Cinfo pódese chegar a grandes
audiencias con calidade profesional a través dunha canle propia de
TV automática, web ou redes sociais”.
Pola
súa banda, o conselleiro salientou que o traballo desenvolvido por
empresas como Cinfo “contribúe a que Galicia logre o seu obxectivo
de colocar ao sector TIC no mapa internacional para competir cos
grandes centros de innovación”.