O fútbol televisado tamén pode contratarse por streaming

O ano pasado, en plena guerra polos dereitos futbolísticos, causou certo rebumbio que operadores como R quedaran fóra de xogo por primeira vez na historia da compañía, polo que os usuarios que quixeran gozar da Liga e outros encontros tiñan que recorrer a alternativas entre as que había algunha baseada na Internet, entre as que destacaba VeoFútbol, plataforma de televisión en liña de Telecable que destacaba por ofrecer numerosos paquetes con contidos de fútbol con independencia do noso operador e con prezos bastante axustados, pero que finalmente vén de mudar de nome para fusionarse coa plataforma multi-dispositivo de Telecable, nunha fusión de marcas que fai que agora VeoFútbol responda simplemente polo nome de Tedi.
Tedi é un servizo sen compromiso de permanencia, que non está ligado a un fogar determinado e con grande flexibilidade de plans, e que aínda que nun principio distribúese a través da Internet (podendo verse a través dun ordenador, unha tableta ou un smartphone), para facilitar o goce do servizo no televisor, a propia compañía tamén ofrece a 60 euros unha tediBox, un pequeno trebello con Android que poden conectarse ao televisor por HDMI e á Internet por Wi-Fi ou Ethernet, de xeito que facilita a reprodución de contidos en liña en pantalla grande.
A oferta de Tedi achega El Partidazo por 4,95 euros/mes, La Liga 1|2|3 (10 partidos de segunda división por xornada) por 6,95 euros/mes, beIN Sports (UEFA Champions League, UEFA Europa League e outras competicións internacionais) por 9,95 euros/mes e beIN LaLiga e LaLiga 1|2|3 por 9,95 euros/mes. Unha oferta moi agresiva que agradecerán os que non poidan contratar o fútbol co seu operador habitual ou non desexen mudar o seu contrato por mor do fútbol.