O iPhone SE podería mudar a súa nomenclatura

Hai uns días que o iPhone SE de terceira xeración desapareceu das tendas de Apple por carecer de carga por USB-C, xunto cos iPhone 14 e 14 Plus, deixando o catálogo da compañía da mazá sen smartphones económicos (o modelo máis barato sería o iPhone 15 con 128 GB de capacidade a un prezo de 859 euros).
Prevíase que para solucionar a situación Apple lanzase unha nova versión do iPhone SE no primeiro trimestre de 2025, pero dende unha das contas dedicadas a publicar filtracións a través de X aseguran que non veremos un iPhone SE de cuarta xeración, senón que o novo móbil de Apple sería un iPhone 16E, cun deseño semellante ao do iPhone 14 e cun botón de acción, vendéndose en cor branca e negra.
Dende China xa se comentaba que o novo teléfono económico de Apple sería o iPhone 16e, o que suporía un cambio bastante importante, xa que até o momento os iPhone SE tiñan o seu propio ritmo de actualizacións (dende 2016 só saíron 3 modelos) e ao asociarse o seu nome á xeración actual de iPhone podería entenderse que a súa intención sería a de renovar o modelo anualmente.
Cómpre salientar que estamos ante información non oficial, e incluso haberá a quen lle resultaría rechamante que Apple realizarse tal cambio de política de actualizacións e nomenclaturas, especialmente porque a propia Samsung xa realizou algo semellante no pasado (en 2019 lanzou o Galaxy S10e como a versión económica da súa nova gama) con pouca fortuna (actualmente os modelos económicos saen bastante máis tarde do lanzamento dos modelos insignia, tendo incluso pouco sentido ao poder conseguirse estes a prezos rebaixados, facendo pouco atractiva a versión supostamente económica).