OpenAI non pode empregar temporalmente a marca io

O anuncio da adquisición de io realizouse cun vídeo no que se presenta a Sam Altman e Jony Ive como un par de amigos que decidiron colaborar

Hai un mes OpenAI publicou un vídeo no que podiamos ver a Sam Altman e Jony Ive dando conta da adquisición de io por parte da compañía responsable do ChatGPT, adiantando que estaban a preparar produtos revolucionarios que integrarían a IA da compañía.
A fichaxe dun dos deseñadores de referencia de Apple, xunto con outros profesionais chegados da compañía da mazá proxectou grande atención nesta operación valorada en 6.500 millóns de dólares, polo que nas últimas horas sorprendeu que toda esa información desaparecese da súa páxina web, de YouTube e de varias redes sociais, espertando rumores sobre a posibilidade de que a colaboración entre ambas compañías estivese en perigo, pero realmente as causas serían outras.
Resulta que, como reza a propia páxina web de OpenAI, a información sobre a compañía de Jony Ive non está dispoñible temporalmente por mor dunha reclamación presentada pola compañía iyO, que considera que a súa marca colide coa de io.
Unha xuíza federal prohibiu temporalmente a OpenAI o uso da marca io, mentres non se resolve este conflito de marcas, pero este conflito xudicial non afectaría de ningún xeito á integración de io en OpenAI para facer realidade produtos baseados en IA que iniciará a súa fase comercial o ano que vén.