Os bibliotecarios galegos súmanse á iniciativa internacional para facilitar o préstamo de ebooks
martes, 22 de abril do 2014
Os libros
electrónicos non teñen, polo de agora e en termos xerais, as mesmas
facilidades cós tradicionais á hora de achegárense en réxime de
préstamo cara aos usuarios das bibliotecas. Os principais atrancos
adoitan vir da man dalgunhas editoriais, que poñen trabas en materia
de licenzas por mor de certa inquietude ante estes novos formatos e
os supostos riscos que terían para os seus dereitos e os dos seus
autores. Pois ben, estes atrancos están a ser combatidos a nivel
internacional polos integrantes da iniciativa The
right to e-read, creada pola Asociación EBLIDA (European
Bureau of Library, Information and Documentation Associations) para
permitir que os lectores teñan as portas abertas cara as novidades
literarias en feitura dixital. Pois ben, segundo puidemos saber ao
remate da Semana Santa, os
bibliotecarios galegos véñense de sumar a esta campaña.
Máis polo
miúdo, a plataforma ANABAD-Galicia,
que esixe por unha banda o dereito “a mercar libros electrónicos a
prezos xustos e con condicións de uso razoábeis”, e por outra
banda a emprazar a certas editoriais a que se animen a vender ás
bibliotecas e centros de lectura as súas novidades e lles perdan o
medo aos novos formatos e ao coñecemento dixital, sendo como son
instrumentos fundamentais de acceso á cultura e aos libros para as
novas xeracións ou para as persoas que non teñen a capacidade
económica para mercar libros tradicionais (xeralmente máis caros).
E engaden: “Queremos que toda a cidadanía, non só as persoas que
os poidan pagar, se beneficien do acceso libre aos libros
electrónicos nas bibliotecas”.
Para
acadalo, propoñen que se negocien modelos de licenza equitativos e
que todo o que se dispoña comercialmente ao abeiro do ámbito
electrónico, no mercado, tamén estea dispoñíbel para a súa
compra e acceso por parte das bibliotecas, e de xeito simultáneo á
súa saída ás tendas en liña. Isto complementarase, sinalan, cun
xusto pagamento aos autores polo préstamos dos seus libros
electrónicos, igual que se fai cos seus libros en papel, “ampliando
o Dereito de Préstamo Publico mediante a inclusión do préstamo do
ebook nas bibliotecas”. O problema é que a día de hoxe, sinalan,
os escritores non reciben compensacións pola achega de libros
electrónicos nas bibliotecas.