Os comerciantes da Compostela vella, en pé de guerra polo mal servizo de Internet e telefonía
martes, 21 de xaneiro do 2020
- Os responsábeis de Compostela Monumental nunha xuntanza recente co alcalde de Santiago, Xosé Sánchez Bugallo
Malia
os
plans iniciados pola axencia autonómica AMTEGA e o Concello para
permitir que a veciñanza que vive nas zonas máis antigas de
Santiago conte cun servizo de Internet de calidade, segue
perpetuándose unha situación que se remonta a hai décadas: as
precarias condicións nas que teñen vivir empresas e fogares en
materia de comunicacións nas ditas contornas urbanas. Esta situación
vén de ser denunciada por Compostela
Monumental, que este martes lanzou duras críticas contra as
operadoras Vodafone e Telefónica por, informa a asociación, “ter
deixado aos comerciantes da zona histórica sen liña telefónica e
Internet durante unha semana”.
Segundo
advirte a entidade, os problemas de servizo complican e moito a
actividade comercial e empresarial da zona, e non deixan moitas
marxes para os plans de revitalización e postas en valor demográfica
que se poidan executar no casco vello.
“É
unha situación límite e que non pode esperar mais tempo a ser
solucionada”, explica o xerente de Compostela Monumental, José
Ángel Blanco, engadindo que arestora hai “unha alta porcentaxe de
de comerciantes usuarios de ambas as operadoras que levan unha semana
sen teléfono nin conexión a Internet, e a outros moitos clientes
cáeselles a conexión cada dúas por tres, así non se pode
traballar”. A asociación recoñece que hai moitos empresarios que
se ven impotentes “ao non poder recibir unha solución de urxencia
a este problema”, o que ocasiona que contacten coas operadoras para
tentar emendar o problema, derivando en longas esperas que non
conducen a nada.
Compostela
Monumental sinala que algúns comerciantes decidiron presentar unha
denuncia directamente na Comisaría de Policía de Santiago, xa “que
a ausencia de conexión telefónica está a afectar aos sistemas de
seguridade dos negocios e queren deixar constancia diso para
responsabilizar de calquera suceso a Vodafone e Movistar”.
Desde
Compostela Monumental xa denunciaron no seu momento irregularidades
desta índole en materia de comunicacións, e mesmo o mal
funcionamento destes servizos ao longo de todos os meses do ano,
“onde a conexión a Internet non alcanza nin 1 Mbps de velocidade,
cando se está pagando por 20 Mpbs”.