Os servizos de subscrición de videoxogos de Microsoft dan un paso de xigante

A feira E3 comeza con moi bo pé, especialmente no que se refire á estrea de servizos que realmente revolucionan o sector, como é o caso das subscricións a xogos que ofrece Microsoft, e que, pese a terse adiantados detalles sobre estes plans, o que non se coñecían eran as súas políticas de prezos, que son as que sen dúbida dispararán a contratación dos servizos que poden marcar o futuro dos videoxogos.
Temos así que o anuncio de que o servizo de subscrición de xogos Game Pass, propio de Xbox One, chegaría a PC, súmase á posibilidade de contratar conxuntamente Xbox Game Pass de consola con Xbox LIVE Gold, e a combinación dos 3 servizos, Xbox Game Pass Ultimate, en vez de ter un prezo mensual de preto de 27 euros custará finalmente 12,99 euros/mes, cun detalle moi especial: será posible darse de alta por 1 euro, activación que converterá até 36 meses dalgunha das subscricións actuais nunha subscrición Ultimate, ou sexa, que quen teña contratado o servizo básico poderá gozar dos tres servizos á vez durante até 3 anos por só 1 euro adicional, o que disparará o número de subscritores que poderán gozar dun catálogo de máis dun cento de xogos para Xbox One e PC, así como de xogo en liña a un prezo sen competencia.
Pero os usuarios que non teñan consola tamén poderán gozar dunha versión específica de Xbox Game Pass, cun acceso ilimitado a máis dun cento de xogos para PC entre os que estarán os títulos de Xbox Game Studios o mesmo día do seu lanzamento, e que custaría 9,99 euros/mes, aínda que durante a beta cobrarán só 3,99 euros/mes e, para animar aos usuarios a probar esta nova experiencia que moitos define como «o Netflix dos videoxogos» só terán que pagar 1 euro.
Con estas atractivas ofertas Microsoft confían en atraer a moitos xogadores de todo o mundo, tanto de Xbox One como con ordenadores persoais con Windows 10, a subscribirse ao seu servizo de videoxogos, creando un hábito que busca ser o equivalente no mundo dos videoxogos do que Spotify e Netflix supuxeron á música e ao cine, e a resposta do público parece dicirnos que vai ser así.