POVISA ofrece videoconferencia gratuíta para os pacientes con COVID-19

POVISA, o hospital privado de Vigo, vén de anunciar unha medida tecnolóxica para facer máis levadías as estancias dos pacientes con COVID-19 nas súas instalacións. Estamos a falar da posta en marcha, a partir deste mércores en todas as terminais de cabeceira dos doentes de coronavirus, dun sistema de balde de videoconferencia para que poidan comunicarse cos seus familiares durante o réxime de illamento ao que están sometidos.
O sistema, que en palabras de POVISA é “único até agora en hospitais de España”, é froito dos esforzos dos servizos técnicos do hospital e máis o provedor das pantallas táctiles, Quantion, que fornecerá ás persoas hospitalizadas “plena autonomía e intimidade para manter conversas privadas sen límite de tempo”. Ofrécese tamén a opción de facer chamadas en grupo.
O obxectivo de POVISA con esta medida, que se une á gratuituidade do servizo de TV dende a semana pasada, nas habitacións, é “compensar dalgunha maneira as esixentes condicións de illamento ás que están sometidos os doentes, fomentando así a comunicación con amigos e familiares”.
Equipos de Povisa e Quantion ultimaron este último día de marzo as probas dos dispositivos, que serán plenamente operativos a partir deste mércores primeiro de abril.