Paula López substitúe a Paulo Félix na dirección adxunta do CiTIUS

A investigadora Paula López, doutora en Física e investigadora adscrita ao CiTIUS (Centro Singular de Investigación en Tecnoloxías Intelixentes da Universidade de Santiago), vén de ser designada oficialmente nova directora adxunta do centro, un cargo a través do que acompañará no liderado do CiTIUS ao catedrático da universidade compostelá Senén Barro, designado como director científico en maio de 2019.
Segundo informan fontes do centro, o nomeamento “prodúcese tras unha década de crecemento e consolidación do CiTIUS encabezada polo investigador Paulo Félix, primeiro como director comisario (2010-2019) e máis tarde como director adxunto, trala creación fai tan só uns meses da figura da dirección científica (2019-2020).
O propio Senén Barro amosou expresamente a súa gratitude: “A título persoal, e en nome do CiTIUS, quero transmitirlle a Paulo o recoñecemento e agradecemento infinitos pola súa dedicación, e polo acerto co que conduciu o noso centro desde a súa orixe ata o centro de referencia en tecnoloxías intelixentes que hoxe somos”.
Fitos recentes
Respecto dos fitos acadados durante o mandato de Paulo Félix, o CiTIUS foi quen evolucionar dende unha semente inicial que “integraba distintas liñas de investigación distribuídas pola USC”, ata converterse, segundo informou a Universidade de Santiago, “nun centro de investigación competitivo a nivel internacional, recoñecido pola industria e cunha excelente proxección cara ao futuro, como acreditan os novos proxectos europeos obtidos nas últimas convocatorias, os numerosos proxectos con empresas, ou o substancial incremento no seu financiamento público trala
resolución da recente convocatoria de axudas concedidas pola Xunta”.
A estratexia da nova dirección
A nova directora adxunta do CiTIUS valorou tamén como “excepcional” o traballo desenvolvido polo seu predecesor: “Espero facer unha xestión digna da herdanza recibida, é un luxo partir da situación actual ante un escenario de tanta responsabilidade”. Segundo engadiu, unha das primeiras accións que se porán en marcha tralo nomeamento será a publicación nos vindeiros días do novo Plan Estratéxico do CiTIUS para o período 2020-2023, un documento no que se recollen as accións chave para favorecer que o centro siga medrando. “A nova planificación estratéxica será sen dúbida un reto que afronto con moita ilusión”, afirma Paula López, engadindo que o centro “leva facendo as cousas ben dende os seus inicios, os recentes e moi importantes logros no ámbito internacional son unha boa mostra diso”.
Extensa traxectoria
Paula López recibiu o título de doutora en Física pola USC en 2003. Tras realizar unha estadía posdoutoral no Instituto Fraunhofer de Circuítos Integrados en Erlangen (Alemaña) regresou a España para continuar a súa carreira investigadora e docente, sendo na actualidade profesora titular na USC.
O seu traballo céntrase no modelado e caracterización de dispositivos microelectrónicos e o deseño de circuítos integrados, unha liña na que na actualidade lidera a participación da USC no proxecto Marie Skłodowska-Curie Innovative Training Network (ITN) MENELAOS_NT, desenvolvido ao amparo do programa europeo H2020.