Qualcomm detalla as especificacións dos Snapdragon 865 e 765

Qualcomm vén de dar detalles da nova plataforma móbil Snapdragon 865, que será a empregada polos móbiles de alta gama que saian nos vindeiros meses, e que apostará por integrar conectividade 5G mediante un modem Snapdragon X55 que podería conseguir velocidades de ata 7,5 Gbps e soportaría os modos 5G NSA e SA (ou sexa, que servirían para a 5G actual e a futura).
Pero ter unha boa capacidade de procesamento e unhas conectividade rápida non é o único no que destacarán os novos procesadores de Qualcomm, senón que tamén facilitarán importantes avances a nivel de cámaras, xa que o ISP Spectra 480 permite gravar vídeos con calidade profesional (4K) mentres dispara brillantes fotografías de 64 Mpíxeles, así como gravar vídeo 8K a 30 imaxes por segundo. Estes procesadores facilitarán o uso de sensores fotográficos de ata 200 Mpíxeles e incluirán soporte de gravación de vídeo a 720p a 960 imaxes por segundo.
A gráfica Adreno 650 tamén abrirá grandes posibilidades a nivel de videoxogos e realidade virtual, podendo reproducir vídeo en 360 graos cunha resolución 8K.
Para dispositivos máis modestos tamén estará a plataforma móbil Snapdragon 765G, que integraría un modem 5G Snapdragon X52, gráfica Adreno 620 e procesador de imaxe Spectra 355 (con soporte de cámaras de ata 192 Mpíxeles e gravación de vídeo a 720p a 480 imaxes por segundo, así como gravación en 4K con HDR), de xeito que permitirá a fabricación de móbiles de gama media con prestacións bastante avanzadas.
Na mesma liña tamén teremos o Snapdragon 765, que sería unha versión que funcionaría a velocidades de refresco inferiores, de xeito que estaría un procesador menos recomendable para videoxogos.
Estes novos procesadores chegarán ao mercado no primeiro trimestre de 2020.