R métese de cheo na tecnoloxía para o fogar dixital
venres, 1 de xuño do 2012
A operadora galega R vén de poñer unha nova
pedra no camiño que nos separa de acadar un auténtico fogar conectado no noso
país, ao anunciar o desenvolvemento dunha plataforma tecnolóxica que faga
posible o que eles chaman, “a Internet do
futuro no fogar dixital asistencial”.
Isto vai permitir que, de xeito indirecto, se
poidan levar a cabo todo tipo de servizos asistenciais nos fogares galegos,
mellorando a calidade de vida das persoas que habitan nela, e sobre todo das
que poidan necesitar asistencia por ser dependentes ou estar en estados
convalecentes.
Máis polo miúdo, o que a compañía prevé facer
nun primeiro momento é controlar todo tipo de sensores na distancia e, unha vez
homologados algúns deles polas autoridades sanitarias, levar os servizos
sanitarios e asistenciais ata os fogares nos que se requiran, abordando,
segundo afirman, “o problema do custo da
sanidade pública e a demanda crecente de pacientes que desexan controlar
persoalmente a súa información sanitaria”.
Porén este sistema, ademais dos servizos
sanitarios que prevén cubrir nun primeiro momento, tamén pode ser usado para
outro tipo de actividades, tales como a medición do consumo eléctrico ou o
control de distintos sensores domóticos.
Ademais de R, que coordina e lidera o plan,
participan no proxecto as empresas tecnolóxicas Bahía, Egatel, Level Telecom,
2Mares e Aldaba e o Grupo Hospitalario Modelo da Coruña; así como os centros
tecnolóxicos CITIUS da USC, Gradiant e Milegroup da Uvigo e IMEDIR da UDC.
Segundo informa o equipo responsable, “poñer en marcha a Internet do futuro no
fogar dixital implica, nunha primeira
fase, desenvolver unha plataforma tecnolóxica – da que se vai encargar R- para provisionar, almacenar e xestionar a
información sanitaria que os usuarios envíen dende os seus domicilios”.
Isto farao a partir dun sistema de sensores
instalados nos diferentes aparellos de uso cotiá do fogar (como pode ser, por
exemplo, unha báscula) que proporcionan en tempo real datos útiles e
información sobre o estado sanitario do paciente.
O sistema proposto derivaría os datos
recibidos do exemplo anterior ás aplicacións en liña de distintos profesionais,
como o médico, o preparador físico, o dietista... que en tempo real poderían
tomar as medidas oportunas e interactuar co fogar do que reciben a información.
O proxecto, que precisa do redor de 3 millóns
de euros para o seu desenvolvemento, recibirá 1,46 millóns do programa
FEDER-ÍNNTERCONECTA.