Senén Barro, director científico do CiTIUS da USC, Premio Nacional de Informática
xoves, 28 de maio do 2020
- Senén Barro na entrada do CiTIUS fotografado por Andrés Ruíz
A
investigación galega está de celebración. O director científico
do Centro Singular de Investigación en Tecnoloxías Intelixentes da
Universidade de Santiago, Senén
Barro, vén de obter o Premio José García Santesmases de mans da
Sociedade Informática de España (SCIE) e máis a Fundación BBVA.
Os galardóns, fallados este martes polo xurado da cuarta edición, a
través de vídeo-conferencia, recoñecen a traxectoria profesional
de Barro polas súas contribucións de gran calidade ao eido da
Intelixencia Artificial e á transferencia de coñecemento. O
galardoado, que foi reitor da USC, colabora decote con Código Cero
con artigos de divulgación tecnolóxica no que reflexiona sobre o
papel relevante que xogarán os sistemas intelixentes nun futuro
inmediato.
O
Premio José García Santesmases é un dos tres Premios de
Investigación Sociedade Científica Informática de España (SCIE) –
Fundación BBVA 2020. O galardón recibe o nome dun dos grandes
pioneiros da Informática en España, que foi impulsor, ademais, dos
primeiros computadores fabricados dende o ámbito estatal.
Senén
Barro é catedrático de Ciencias da Computación e Intelixencia
Artificial (IA) na Universidade de Santiago de Compostela (USC). O
xurado valorou a súa traxectoria, destacando que “non só posúe
un brillante currículo investigador, senón que tamén foi fundador
dun grupo de investigación de referencia e de startups
tecnolóxicas”.
O
fallo conclúe que “as súas contribucións á promoción do
emprendemento innovador e á divulgación científica son recoñecidas
internacionalmente”; e que “ten sido tamén un promotor moi
activo dos estudos da Informática desde os diferentes cargos
relevantes que ostentou”, engade.
Pola
súa banda, o director científico do CiTIUS compartía deste xeito a
súa satisfacción polo recoñecemento recibido: “Agradezo e
celebro moito esta distinción, polo seu prestixio e por tratarse dun
premio que se concede pola importancia da investigación e a
transferencia dos seus resultados, no meu caso no ámbito da
Intelixencia Artificial”. E engadiu, respecto do feito de compartir
o recoñecemento con investigadores e investigadoras de primeiro
nivel: “A importancia dun premio vén dada tamén por aqueles que o
recibiron antes, e todos os anteriores premiados son persoas de
excepcional valía, a cuxa altura científica espero corresponder”.
Segundo fixo saber, trátase dunha distinción “que honra tamén á
Universidade de Santiago de Compostela e servirá para dar unha maior
visibilidade e protagonismo ao CiTIUS, o centro de investigación en
Tecnoloxías Intelixentes que
dirixo, e isto faime especialmente feliz”.
A
cuarta edición dos Premios de Investigación Sociedade Científica
Informática de España (SCIE) – Fundación BBVA recoñece desde
xeito por primeira vez a un investigador do CiTIUS nunha das súas
dúas modalidades: os Premios Nacionais de Informática; unha
categoría destinada a recoñecer o labor de investigadores e
entidades públicas e privadas na área da Informática que adicaron
a súa carreira profesional e o seu esforzo ao estudo, fortalecemento
e divulgación desta disciplina.
Con
todo, o CiTIUS lembra que esta é a segunda ocasión na que un
científico do centro aparece entre os premiados: no ano 2017, o
investigador Alejandro Ramos (actualmente en etapa postdoutoral no
centro compostelán), foi recoñecido como un dos seis doutores
premiados en toda España na categoría Investigadores Mozos
Informáticos, destinada a distinguir traballos de tese innovadores e
relevantes.