Senén Barro recolle o Premio Nacional de Informática de mans do SCIE e a Fundación BBVA

venres, 19 de novembro do 2021 S. P.

Senén Barro, director científico do CiTIUS, catedrático de Ciencias da Computación e Intelixencia Artificial na Universidade de Santiago de Compostela, recibiu este xoves 18 de febreiro en Madrid o galardón que recoñece a súa traxectoria investigadora na cerimonia de entrega dos Premios de Investigación Sociedade Científica Informática de España - Fundación BBVA 2020-2021.
“É unha honra inmensa. O meu agradecemento ao xurado, á SCIE e á Fundación BBVA non só polo galardón, senón tamén porque a través dos premios nacionais prestixian a investigación española en informática”, sinalou no acto de entrega de galardóns.
Na súa alocución, Senén Barro tivo palabras de agradecemento pola distinción, agradecemento que estendeu a todas persoas que lle acompañaron durante a súa carreira: "Son moitas, ao longo dunha vida dedicada á universidade, e en particular quen o fixeron como parte do Grupo de Sistemas Intelixentes (GSI), que creei hai máis de tres décadas, e do que me sinto enormemente orgulloso; o grupo, os investigadores que o forman, son sen dúbida o meu mellor proxecto científico: un proxecto creado en e grazas á miña alma mater, a USC, que me deu todo o que son profesionalmente”.
Así mesmo, o director do CiTIUS insistiu na necesidade de reforzar a investigación nesta área do coñecemento ante a oportunidade que se presenta no actual contexto histórico, coa crecente expansión da Intelixencia Artificial: "No ámbito da IA, ou facemos unha investigación de calidade, pertinente e relevante, ou seremos insignificantes na tecnoloxía máis transformadora, social e economicamente, xamais desenvolvida”.
Para o investigador galego, unha máquina intelixente debe saber resolver problemas complexos cun alto grao de autonomía e capacidade de aprendizaxe: “Sempre me apaixonou o reto de facer máquinas intelixentes; considérome un investigador de tipo explorador: ter intereses amplos fíxome explorar distintos eidos da Intelixencia Artificial”.
Comezou a súa carreira académica coa defensa dunha tese doutoral (1988), na que creou o primeiro sistema de monitoraxe de pacientes en UCI que empregaba Intelixencia artificial. Asemade, esforzouse por lograr que as máquinas entendesen as imprecisións da comunicación humana.
No que respecta ao futuro máis próximo, o ex reitor da USC conclúe que “a IA é a tecnoloxía máis transformadora que desenvolvemos nunca, e só se apostamos por unha IA na que poidamos confiar e que estea dirixida ao ben común, amplificaremos os seus beneficios e atenuaremos os seus posíbeis prexuízos”. Unha máxima que, en palabras de Senén Barro, “guiou sempre o labor do Grupo de Sistemas Intelixentes, a miña en particular, e que agora tamén abandeira o CiTIUS”.

PUBLICIDADE