Televés traballa nun proxecto europeo para liberar á industria dos defectos na fabricación

mércores, 2 de febreiro do 2022 S. P.

A empresa galega Televés impulsa unha iniciativa para levar aínda máis lonxe a industria automatizada e intelixente e conseguir procesos de fabricación con cero defectos. Trátase do proxecto OPTIMAI, un paso adiante dos sistemas de controis de calidade que mobiliza tecnoloxías encamiñadas a “reducir os desperdicios, eliminar defectos, maximizar a produtividade e mellorar a calidade dos procesos de produción”. Segundo informa a firma de Santiago, o proxecto está destinado a ter “un impacto tanxíbel na industria europea e a sustentabilidade ambiental”.
En palabras de Nikolaos Dimitrou, responsábel do proxecto dende o Centro de Investigación e Tecnoloxía de Hellas (CERTH-ITI), “estamos a buscar crear un novo ecosistema industrial, optimizando os procesos de produción a través dunha combinación única de instrumentación intelixente, metroloxía, Intelixencia Artificial, virtualización e Realidade Aumentada”.
Televés é un das empresas participantes, que actuará principalmente como usuario final (piloto) nesta iniciativa. Máis concretamente, o piloto centrarase na liña de produción de antenas. Neste punto, a compañía de Santiago porá en xogo a súa longa bagaxe tecnolóxica e industrial ao servizo de 10 células robóticas que traballarán de forma coordinada fabricando máis dun millón de antenas por ano de forma totalmente automatizada. “A partir de diferentes produtos intermedios como carcasas de plástico e chasis metálicos e módulos de electrónica provenientes das nosas liñas de produción, as antenas saen de fábrica perfectamente embaladas e listas para a súa distribución en calquera parte do mundo”, sinala Sebastián Pantoja, director de programas estratéxicos de Televés.
O proxecto de tres anos, financiado polo programa de investigación e innovación Horizonte 2020 da Comisión Europea, servirá para dar forma ao que Televés denomina “as fábricas do futuro”. Farao grazas “ao seu conxunto único de tecnoloxía intelixente deseñada para o ámbito da fabricación”. OPTIMAI lanzouse en xaneiro de 2021 e acaba de entrar no seu segundo ano.
O doutor Dimitriou e o seu equipo deseñaron o conxunto de ferramentas OPTIMAI, que inicialmente probarase e validarase en fábricas centradas na fabricación de antenas de Televés e na montaxe de microelectrónica en Grecia, España e o Reino Unido, respectivamente. As solucións, que son “altamente adaptábeis”, explica Televés, “aplicaranse logo nunha ampla gama de contornas industriais e comercializaranse en toda Europa”.
As partes principais do kit de ferramentas desenvolvido polas organizacións contribuíntes (incluída Televés en Santiago de Compostela) inclúen un sistema de apoio á toma de decisións que detecta e emite notificacións temperás de defectos; un sistema continuo de inspección de produción, monitoraxe e calidade impulsada por sensores intelixentes; un mercado intelixente para a reciclaxe de chatarra; xemelgos dixitais para simulación e prognóstico de procesos industriais e máis un marco regulamentario e ético integral que rodea as tecnoloxías.

PUBLICIDADE