The Net Room introducirá á impresión 3D na Coruña

Tras a celebración dunha concorrida primeira edición de The Net Room no Hotel Moure de Santiago de Compostela coa presenza estelar de Pedro Serrahima, director xeral de Pepephone, este evento organizado por María Mosquera e Laura Camino retoma a actividade o vindeiro sábado 24 de maio ás 12:00 horas, e nesta segunda edición volve a abordar un tema de actualidade, e tras o anterior repaso ás estratexias e ferramentas de marketing low cost chega agora a impresión 3D, tecnoloxía que xa non é un futurible, senón que a temos cada día máis presente.
A esta nova edición de The Net Room poderán asistir ata un máximo de 40 persoas, para poder ver, tocar e coñecer as últimas novidades en canto á impresión 3D, dende a perspectiva empresarial e a do código aberto. Os encargados de introducir aos participantes neste ámbito serán Xoán Sampaiño, apaixonado do hardware libre, e os responsables de Galiprint3D, primeira empresa galega de impresoras 3D, que falará de como facer na casa unha impresora e dará conta das tendencias e aplicacións en 3D que veremos nos vindeiros anos.
Este encontro desenvolverase na casa piloto da empresa galega de casas modulares Cube, que estará situada na praza central do Centro Comercial Marineda City da Coruña, cumprindo así o obxectivo desta serie de eventos que busca celebrarse nunha serie de ambientes acolledores e relaxados, para conseguir un contacto máis directo entre relatores e roomers.
Os asistentes poderán reservar unha cita de asesoramento expreso de 10 minutos cos expertos e gozarán dun vermouth mentres fan networking co resto de participantes por cortesía de Saborplace, plataforma de comercio electrónico con produtos ecolóxicos e artesanais.
Os interesados en participar neste encontro poden formalizar a súa inscrición a través da páxina web do evento, tendo esta actividade un prezo de 15 euros.