Tuenti incorpora bonos de datos ás súas tarifas de prepagamento

Entre a mocidade continúa a ser habitual o uso de telefonía móbil de prepagamento, o que non é incompatible con querer gozar de acceso a Internet dende os seus dispositivos, e atendendo a iso o operador virtual móbil (OMV) de Tuenti estrea bonos mensuais de datos de 1 e 3 Gb por 6 e 15 euros/mes respectivamente, ofrecendo de balde o primeiro bono de 1 Gb durante a activación das tarxetas SIM de Tú (o que precisa dunha recarga de 10 euros). Os bonos renovaranse automaticamente ata que o usuario decida cancelar a subscrición.
Os usuarios que gocen desta tarxeta SIM tamén terán unhas tarifas bastante atractivas, pois permite chamadas nacionais a calquera operador por 3 céntimos/minuto (cun establecemento de chamada de 15 céntimos), mensaxes de texto a 8 céntimos e cada Mbyte da datos fóra de bono custaría 8 céntimos.
É de agardar que nas vindeiras semanas lancen unha promoción semellante para usuarios de contrato, aínda que en calquera caso resulta bastante atractiva a oferta deste operador por achegar terminais subvencionados a prezos moi atractivos, pois parte dun smartphone ZTE Racer II por 49 euros (59 euros se incluímos a primeira recarga).