Turismo de Galicia estrea aplicación para Android do Camiño de Santiago

No marco do proxecto Smart Camiño nace a aplicación móbil do Camiño de Santiago da Axencia de Turismo de Galicia, que ten como obxectivo acompañar aos peregrinos na súa viaxe a Compostela e ser a súa guía, e que xa está dispoñible para a súa descarga en Google Play.
A través desta nova aplicación móbil os peregrinos poden obter información sobre todas as rutas oficiais do Camiño de Santiago desde a súa entrada en Galicia: Camiño Francés, Ruta Fisterra-Muxía, Vía da Prata, Camiño Portugués, Camiño Inglés, Camiño Primitivo, Camiño do Norte, Ruta do Mar de Arousa e Río Ulla, e Camiño de Inverno.
Os peregrinos dispoñen, así, en tempo real, de toda a información que necesiten en cada momento sobre os trazados oficiais das rutas xacobeas, a Rede Pública de Albergues coas súas características, horarios, localización, teléfono e fotografías; información sobre os eventos culturais; así como información detallada de todos os recursos turísticos (descrición, localización e imaxes). Tamén poderán consultar nela onde comer, onde aloxarse e que visitar en cada un dos tramos do Camiño coñecendo a ampla oferta dos establecementos turísticos cos que conta.
Esta ferramenta móbil non esquece a información meteorolóxica ofrecida por Meteogalicia, así como datos de contacto e enderezo dos centros de saúde e emerxencias e, aparte de todas esta información de utilidade moi directa, tamén inclúe funcionalidades como o apartado Meu diario, no que os peregrinos poden gardar os momentos máis importantes do camiño a través de notas de texto e fotografías para poder crear logo o seu libro dixital no espazo web A Miña Experiencia.
A aplicación está localizada ao galego, español e inglés, podendo empregarse boa parte das súas funcións sen precisar de cobertura no móbil.