Un equipo da UVigo leva ao eido do videoxogo unha das obras de José Saramago
martes, 26 de setembro do 2017
Sabíamos
que se podían converter en filmes todo tipo de novelas ou obras de
teatro, pero do que aínda non tiñamos constancia é de que tamén
se poden converter obras mestras da literatura en videoxogos. Isto é
o que vén de facer o grupo de innovación docente ComTecArt
(Comunicación, Tecnoloxía e Arte), do Campus de Pontevedra, un
equipo multidisciplinar que arrancou a súa actividade traballando
colectivamente co alumnado de Comunicación Audiovisual e de
Enxeñaría de Telecomunicación para faceren un videoxogo baseado
nunha obra de José Saramago. O libro elixido foi A viaxe do
elefante. A idea é poder presentar o primeiro nivel do videoxogo
nas xornadas que a Cátedra Internacional José Saramago da
Universidade de Vigo celebrará o vindeiro mes de novembro na cidade
de Pontevedra.
A iniciativa está coordinada polos
docentes Antonio Pena, Enrique Costa e Juan Carlos Burguillo, da
Escola de Enxeñaría de Telecomunición, e Beatriz Legerén e Mónica
Valderrama da Facultade de Ciencias Sociais e da Comunicación. A
maiores contan tamén coa colaboración do director da cátedra, o
profesor da Facultade de Filoloxía e Tradución Burghard Baltrusch,
quen sinala que todo o equipo (os profesores e os trinta estudantes
que participan) asumiu este traballo con gran ilusión, entre outras
cousas porque foron quen de ver que A Viaxe do Elefante, amais
dun conto histórico, abrangue “un debate sobre a complexa relación
entre realidade, ficción e historiografía, algo que tamén pode
estar presente nun videoxogo”, explica.
Respecto
do traballo colectivo a desenvolver, o alumnado de Comunicación
Audiovisual vaise encargar de crear o deseño conceptual e de
establecer todos os mecanismos de xogo, as regras, o aspecto
artístico, o manual, os labores de comunicación, incluíndo a
creación dun caderno de bitácora, canles de redes sociais, etc.
Pola súa banda, os da EE de Telecomunicación encárganse de facer e
crear o interface do xogo e o xogo en si. Ou sexa: trasladar á
realidade o que se está a deseñar (alumnado da materia de
Tecnoloxía Multimedia) e de programar os personaxes non xogadores do
xogo (estudantes da materia Programación de Sistemas).
O
obxectivo principal, segundo informan os responsábeis do proxecto,
“é facer traballar aos estudantes en grupos realmente
multidisciplinarios en materiais non orientadas a iso”. E engaden:
“Trátase de abrirlles a mente a traballar con xente aparentemente
afastada a eles”.
Respecto
dos prazos, deuse forma a grupos de media ducia de persoas con dous
estudantes de cada unha das materias. “As sesións conxuntas
celébranse cada semana nun campus, logo teñen tamén clases pola
súa conta nos tres casos”, explica Beatriz Legerén, ao que engade
que “cada profesor vai valorar ao alumnado polas súas sesións
individuais e os contidos específicos da súa materia, pero outra
parte da nota vai ser por este traballo conxunto que van facer entre
todos”, engade a docente.
As materias son
cuadrimestrais, polo que os prazos nos que se moven están
delimitados por esta marxe temporal. “Faremos un seguimento con
reunións quincenais e observación da actividade na contorna de
xestión de proxectos que usarán”, explica Antonio Pena, engadindo
que a idea é “ter unha beta xogábel de cada videoxogo a finais de
novembro, para levar a cabo os últimos axustes na primeira semana de
decembro, antes dos exames”. A intención, di, é facer públicas
as versións para que calquera poida xogar e dar a súa opinión.