Unha aplicación móbil axúdanos a localizar os mellores prezos

Os hábitos de consumo non paran de mudar por mor das TIC, o que resulta moi evidente na perda de peso que foron tendo no mercado os establecementos físicos, que están a ser vítimas de prácticas como o showrooming (que consiste en ver os produtos nas tendas para logo mercalos a través da Rede), e unha aplicación móbil contribúe a fornecer esta tendencia, xa que fai moi doada a busca e comparación de prezos mediante buscas manual ou incluso escaneando coa cámara do móbil o código de barras do produto que resulte do noso interese.
Onyougo é un comparador de prezos que presume de ser insubornable, que conta cun catálogo de máis de 17 millóns de referencias nas que se atopan electrodomésticos, smartphones, produtos de cosmética, roupa, material deportivo, xoias, reloxos, produtos de alimentación… infinidade de produtos que podemos atopar en tendas en liña, localizando o prezo máis barato en poucos segundos, facilitando as nosas decisións de compra e permitíndonos así aforrar uns euros para chegar de xeito máis doado a fin de mes.

Empresa acelerada en Conector

Este proxecto naceu baixo o paraugas de Conector Startup Accelerator, aceleradora de empresas que conta entre os seus socios con figuras como o mediático Risto Mejide, Marc Vidal (empresario e analista que actualmente participa da spin-off da USC Cilenis) ou Carlos Blanco (un dos emprendedores máis destacados do Estado, fillo de galegos), e fundárono o seu director xeral, Sergi Rodríguez, e o seu director tecnolóxico, Daniel Rodríguez, descendente de Pobra de Trives.

As aplicacións estarán dispoñibles en galego

Actualmente Onyougo pode empregarse vía web, aínda que o xeito máis natural de uso serían as súas aplicacións móbiles, dispoñibles totalmente de balde na App Store e en Google Play, que na súa vindeira actualización incluirán soporte de galego e incluso está a preparar a súa adaptación a smartwatches. Aínda que Onyougo pode verse como un grande motor do comercio electrónico ao comparar prezos de máis de 2.000 tendas en liña, tamén pode potenciar a venda en establecementos físicos, xa que conta con preto de 80.000 tendas físicas xeolocalizadas, de xeito que cando atopa un resultado no móbil pode indicarnos a tenda máis próxima na que podemos atopar o produto que nos interesa, funcionalidade de grande utilidade para cando buscamos facernos rápido cun produto ou cando preferimos o comercio tradicional á hora de pechar as nosas compras.