Unha iniciativa de San Sadurniño concorrerá no certame europeo ACting

Unha iniciativa desenvolvida ao abeiro da aula CeMIT de San Sadurniño vén de ser elixida para representar o ámbito estatal no certame europeo ACting. Segundo informa AMTEGA, axencia da que depende a Rede CeMIT, a proposta galega seleccionada para o concurso foi elixida entre unha ducia de achegas. A final do certame desenvolverase en Xenebra, Suíza, os días 23 e 24 de setembro. Fálame de San Sadurniño, a achega galega que concorrerá en ACting, é unha iniciativa colaborativa na que participaron unhas 200 persoas (sobre todo persoas maiores) e que se materializou nun blog de seu, nunha canle de YouTube e en diferentes presenzas nas redes sociais. O obxectivo de todo isto: dar a coñecer perante o mundo o dito concello galego a través de quen mellor o coñece, os seus veciños.
O xurado, formado por Joaquim Torrents, presidente da Asociación Nacional de Redes de Telecentros; Isabel Herranz, subdirectora de Planificación, Ordenación e Avaliación do IMSERSO; e Ismael Pena, director de Innovación Aberta da Fundación Bofill, considerou que se trata “dun proxecto sinxelo, único e orixinal, construído ao redor de catro eixos centrais: que as fotos falen, que o pasado e o presente estean fusionados, o protagonismo dos usuarios e a mestura de formatos, debullando o concepto de continuidade histórica das comunidades rurais no transcurso do tempo”.
O axente social que promoveu a iniciativa e unha persoa maior do concello, en representación de todas as que participaron, acudirán ao evento final en Xenebra, onde se darán a coñecer as propostas seleccionadas dos catro países que participan no proxecto: España, Italia, Romanía e Suíza.
Ademais de Fálame de San Sadurniño, seleccionouse como finalista a iniciativa SpeakSpeare!-Falamos con William2, da Universidade Senior da Coruña, e outorgouse unha mención especial a Compartim Poble-sec (Compartimos Poble-sec), de Barcelona.
O proxecto ACTing pretende proporcionar aos axentes sociais que traballan con persoas maiores uns coñecementos e unha metodoloxía adaptada a este colectivo co fin de promover o envellecemento activo a través das TIC. Financiado a través do Organismo Autónomo Programas Educativos da Comisión Europea, está liderado por Fundetec e conta coa participación de entidades que representan a catro países: España (Fundación Esplai), Italia (Fondazione Mondo Digitale), Romanía (AEPMR) e Suíza (ICVoluntarios).