Worten venderá a súa tenda de Vigo

A cadea de tendas de electrónica de consumo Worten non parece ter moi boa fortuna en España. Lembremos como tivo que pechar as súas tendas de A Coruña e Santiago de Compostela, quedando só con presenza en Vigo, cidade na que venderá o seu establecemento a MediaMarkt (xunto con outras 16 tendas), á vez que tamén pechará 14 tendas no territorio español, quedando unicamente con establecementos en Madrid e Illas Canarias.
A operación de compra das tendas por parte de MediaMarkt inclúe a transferencia de boa parte dos empregos, pretendendo esta profunda reestruturación a redución das perdas da compañía que chegou a ter até 60 tendas repartidas por toda España, e que agora deberá centrarse nas poucas tendas que manterá abertas e, moi especialmente, nas vendas a través da Internet.