Xa está listo o borrador do regulamento para o remate do sobrecusto do roaming en Europa

O ano pasado a Comisión Europea databa en xuño de 2017 a data para o remate dos sobrecustos da telefonía móbil en itinerancia dentro da Unión Europea, deixando pendente a determinación dos límites que tería esta medida para evitar abusos, ou sexa, para evitar que un cidadán puidese contratar unha liña telefónica noutro país para facer un uso permanente da mesma a un prezo reducido (desvirtuando o concepto de itinerancia) e finalmente xa teñen listo borrador do regulamento da nova medida, no que detállanse as condicións que entrarán en vigor o ano que vén tras a súa aprobación o vindeiro 15 de decembro (pasando por un proceso no que poden realizarse modificacións, aínda que posiblemente sexan moi lixeiras, xa que estamos ante un texto nacido dunha ampla consulta pública).
O texto recolle unhas condicións de bo uso que deberán seguir as compañías de telefonía móbil no territorio comunitario, entre as que destaca o feito de que, de xeito xeral, establécese que un usuario poderá librarse dos sobrecustos da itinerancia durante 90 días ao ano. Pero a cousa non quedaría aí, senón que tamén habería un límite de 30 días seguidos como tempo máximo no que unha liña podería estar operativa fóra do seu país de orixe para poder gozar da eliminación dos sobrecustos por itinerancia. Cómpre detallar que en casos nos que un usuario se conecte á súa rede local e a unha rede visitante no mesmo día non se computará nin dentro dos 90 días ao ano, nin nos 30 días seguidos de uso en itinerancia, ou sexa, que procurarase así protexer aos consumidores que viven en zonas fronteirizas.
As compañías tamén poderán detectar usos anómalos dos servizos de itinerancia, por exemplo, en casos nos que o uso das liñas no país de orixe fose moi reducido, ou cando unha liña permanecese practicamente inactiva agás para facer uso da mesma en itinerancia. Tamén realizarán probas para controlar que non se clonen as tarxetas SIM para o seu uso noutros países europeos.
En calquera caso, aparte da normativa comunitaria os operadores deberán detallar nos contratos de telefonía as condicións que aplicarán (de feito, xa hai compañías que omiten as limitacións propostas como un incentivo para captar clientes).
Sobre os prezos maioristas, que aínda terán que ser aprobados e que revisaranse periodicamente, a Comisión propón que as chamadas móbiles custen 4 céntimos/minuto, 1 céntimo por mensaxe de texto e 0,85 céntimos por MB de datos.