YouTube facilita a publicación de vídeos en varios idiomas a máis creadores

Dende YouTube levan meses permitindo que un grupo selecto de creadores de contido poidan publicar vídeos na súa plataforma con pistas de audio en varios idiomas, como se estivésemos cunha película en DVD ou nunha plataforma de streaming, co que as creacións publicadas en YouTube teñen máis doado chegar a un público máis amplo, e finalmente anuncian que abren esta posibilidade a milleiros de creadores (sen concretar o número), polo que estaríamos cada vez máis preto de que calquera poida publicar vídeos con pista de audio en varias linguas.
A principal canle na que están a experimentar con este formato é MrBeast, canle en inglés que xa hai tempo que ten unha canle secundaria en español, pero que actualmente opta por publicar os contidos na canle principal con audio en 11 idiomas, o que facilita enormemente a súa internacionalización.
Dende YouTube aseguran que os vídeos que contan con varias pistas de audio melloran o seu tempo de reprodución máis dun 15%, aínda que cómpre salientar que algúns tipos de vídeo teñen especial éxito nuns países en concreto, polo que certos creadores están especialmente interesados en poder ofrecer os seus contidos en varios idiomas, para así ampliar o seu alcance e chegar a públicos moi receptivos a consumir o seu tipo de contido.