VíaVigo abre sede en Lugo para a súa terceira edición de apoio ao emprendemento innovador

VíaVigo, a aceleradora de empresas impulsada polo Consorcio da Zona Franca, vén de abrir nova sede en Lugo, máis polo miúdo nas instalacións da Confederación de Empresarios local. O obxectivo deste espallamento é dar acollida e pulo a novos proxectos innovadores e tecnolóxicos xurdidos no norte da nosa terra. A longo prazo, os responsables da aceleradora queren “replicar” o modelo polas catro provincias e servindo de paraugas a todos os sectores de actividade baixo o nome de VíaGalicia. Estes datos foron dados a coñecer na presentación da terceira convocatoria da palestra empresarial, dirixida como lembraremos a “impulsar as mellores ideas e axudar a convertelas en negocios de éxito”.
Segundo fai saber o Consorcio, que recalca que estamos ante “unha das aceleradoras máis potentes de España”, o prazo para concorrermos na nova edición estará aberto ata o vindeiro 15 de xullo. “Nesta terceira convocatoria”, informa a Zona Franca, “os proxectos seleccionados accederán a un programa académico a desenvolver nas sedes de Lugo e Vigo”, segundo a escolla dos promotores. A fase final, a fase da aceleradora, realizarase de maneira exclusiva no Centro de Negocios de Porto do Molle, en Nigrán, “onde se facilitarán os medios precisos para o proxecto empresarial ata convertelo nun negocio rendible e sustentable”.
A nova edición agroma dunha suma de esforzos por parte da Zona Franca e a Xunta de Galicia. O financiamento que se fará chegar aos quince proxectos finalistas acadará nesta convocatoria a cifra de 1.875.000 euros, entre capital semente e achegas a fondo perdido, máis outros 375.000 euros en gastos de formación e consultoría.
VíaVigo 2015 é un programa de apoio e asistencia a emprendedores promovido polo Consorcio e a Consellería de Economía e Industria, a través da Axencia Galega de Innovación (GAIN) e da sociedade xestora de dos fondos de capital-risco da Xunta (XesGalicia) e tamén pola sociedade de capital-risco do Consorcio, Vigo Activo.
As iniciativas seleccionadas terán ao seu dispor as infraestruturas precisas para activar a empresa; contarán con profesionais e expertos que lles asesorarán ao longo de todo o proceso, e mesmo os adestrarán para presentar canda un dos proxectos a investidores privados que poidan aportarlles financiamento e outros recursos.
Para inscribirse habilitáronse as plataformas viavigo.es e viagalicia.gal, onde se facilita toda a información dos diferentes pasos de selección. Segundo informan os impulsores da iniciativa, os participantes poderán ver como unha vez inscrito o proxecto este será valorado polo Comité Técnico do Programa que preseleccionará ata 40 ideas de negocios por cada sede entre as que mellor respondan aos criterios de innovación, “acelerabilidade e investibilidade”. No seguinte paso, cada grupo dos corenta seleccionados pasarán a participar no Startup Day a celebrar en Lugo e Vigo nunha xornada na que se seleccionarán os seguintes 20 mellores proxectos que poderán continuar nas dúas academias e dos que, noutra avaliación, sairán os 15 finalistas para a fase de aceleradora que se celebrará con una única sede en Porto do Molle. Estes 15 finalistas poderán recibir apoios económicos de ata 125.000 euros.