musical.ly convértese en TikTok

xoves, 2 de agosto do 2018 Marcus Fernández

Unha das aplicacións móbiles de moda entre a mocidade, musical.ly, vén de dicir adeus, xa que a empresa que a mercou a finais do ano pasado por uns mil millóns de dólares, Bytedance Technology, decidiu fusionala con outro dos seus produtos, TikTok, que vén de renovarse como aplicación para iOS e Android na que xúntanse as funcionalidade de ambas plataformas de vídeo de curta duración para procurar construír unha aplicación global de maior impacto.
Coa fusión de TikTok e musical.ly pretenden converterse nun referente para os creadores de vídeos breves, e os usuarios actuais poderán gozar da nova aplicación sen traumas, xa que os seus contidos moveranse de xeito automático á nova plataforma.
Aproveitaron a renovación da marca para introducir novidades na aplicación, de xeito que agora os usuarios poderán reaccionar aos vídeos dos amigos directamente dende o móbil; estrean novas ferramentas creativas avanzadas como filtros de cámara que imitas as casas de espellos dos parques de atraccións; conta con filtros tipo realidade virtual que poden activarse con pestanexar; e con efectos de chroma (para substituír o fondo dos vídeos).
Actualmente musical.ly tiña 100 millóns de usuarios activos ao mes, e agora haberá que ver se esta actividade se traslada á nova aplicación ou se padece as consecuencias dun cambio de marca tan brusco.

PUBLICIDADE