A OSHWDem 2016 acubillará un torneo de robótica para “negados” en robótica
mércores, 17 de agosto do 2016
Seguimos a falar da máis
que interesante irmandade entre o espírito Maker (o espírito
de loitar contra todos os límites e atrancos que se poidan
interpoñer entre nós e a creación de tecnoloxías coas nosas
propias mans) e a nosa terra. Se
hai uns días lembrabamos como quecía motores o Market Faire Galicia
(ao berro de Haiche moito maker! e reivindicado un xeito de
reciclar e argallar que nos vén da antigo), agora é a quenda da
OSHWDem, unha cita referencial
impulsada por BricoLabs para os defensores de “faino ti mesmo” e
que celebrará unha nova edición, a quinta, na Domus da Coruña.
Será o 5 de novembro e en vindeiras datas poderemos ir sabendo máis
cousas do programa previsto, unha
vez máis artellado sobre todo tipo de achados e ideas relacionados
co hardware e a cultura libre.
Entre as actividades das
que se está informar cómpre salientar o III
Torneo Galego de Sumo Robot ou a
celebración da competición de robótica Hebocon. Esta última
actividade consiste nunha competición de robótica para, en palabras
dos impulsores, “persoas tecnicamente desfavorecidas”. Ou sexa,
xente que non ten coñecemento algún de programación nin é “quen
de distinguir un LED dunha resistencia”. Entre os puntos a destacar
polos organizadores do certame, tendo en conta o devandito, non
figurarán polo tanto a capacidade técnica do robot nin do seu
construtor, “senón todo o contrario”. E engádese: “Hebocon é
unha competición de sumo onde robots defectuosos, cun deseño entre
mediocre e espantoso e cunhas características técnicas deficientes,
tentan participar para derrubar ao seu adversario”.
Máis sobre OSHWDem
Na OSHWDem 2016 colaboran
a Asociación Ghandalf ao abeiro do convenio de colaboracións entre
as AGULS e a AMTEGA para a difusión do software libre en Galicia.
Este evento botou
a andar en 2012, seguindo a filosofía BarCamp sobre electrónica
e Open Source Hardware e permitindo, polo tanto, que o público
puidese facer un achegamento aos ámbitos tecnolóxicos de maior
dinamismo nos últimos anos. A cita está organizada pola asociación
BricoLabs, que semanalmente xunta a interesados en deseñar,
construír e probar todo tipo de trebellos propostos polos propios
participantes, e que nesta feira contan con convidados doutras partes
da Península, que amosarán os seus proxectos e impartirán
relatorios do máis variado.