A primeira viaxe de proba de coches autónomos en España partiu hoxe de Vigo
luns, 23 de novembro do 2015
Hai unha semana
Dirección Xeral de Tráfico estableceu
o marco para a realización de probas con vehículos de condución automatizada
por vías abertas á circulación, permitindo así realizar ensaios de
investigación para facilitar o futuro desta tecnoloxía, de xeito que séntanse
os alicerces para o I+D nesta materia no noso territorio, oportunidade que non
quere deixar pasar Peugeot Citroën, que tras recibir a primeira autorización
para iniciar as probas dos seus coches autónomos en España, iniciou
hoxe unha viaxe de 599 quilómetros entre Vigo e Madrid nun Citroën Grand
Picasso equipado con tecnoloxía para a súa condución autónoma, aínda que
sempre cun condutor humano supervisando o proceso (para cumprir cos obrigas
regulamentarias).
O prototipo de Citroën será capaz de adaptar a velocidade aos límites da vía e
ás condicións do tráfico e incluso realizar adiantamentos sen intervención do
condutor, e realizará de xeito autónomos os tramos que percorren por autovías e
autopistas (ou sexa, vías nas que ambos sentidos de circulación están separados
por medianeiras).
O primeiro tramo da viaxe emprendida esta mañá foi entre Balaídos e o Centro
Tecnolóxico de Automoción de Galicia (CTAG) no Porriño, con máximos
responsables da compañía automobilística viaxando no vehículo; mentres que no
segundo tramo, entre Porriño e A Cañiza, foron
o presidente da Xunta, Alberto Núñez Feijoo, e o conselleiro de Economía,
Traballo e Industria, Francisco Conde, os que puideron gozar da viaxe neste
revolucionario vehículo. Pola tarde realizarase a recepción do vehículo na
factoría de PSA Citroën en Madrid.
- Núñez Feijoo e Francisco Conde probaron o vehículo no traxecto entre o Porriño e A Cañiza
Núñez Feijoo, asegurou, tras participar no mencionado
traxecto de proba, que o vehículo autónomo deseñado por PSA Peugeot Citroën acredita
o alto nivel do traballo que veñen desenvolvendo Galicia e o Centro Tecnolóxico
da Automoción de Galicia (CTAG) no eido da condución automatizada. Sinalou
que PSA acertou ao confiar na tecnoloxía galega, porque queda acreditado que
“Galicia non so é un bo lugar para construír automóbiles, que o é; non só é un
bo lugar para deseñar e construír as pezas e os accesorios para os vehículos,
senón que tamén é un bo lugar para aproximarnos ao futuro da automoción”.
Este vehículo é resultado do traballo conxunto entre o CTAG
e PSA, que puxeron en marcha en 2014 a primeira unidade mixta de investigación
impulsada pola Xunta entre unha empresa multinacional e un centro tecnolóxico
galego. Unha unidade á que lle correspondeu desenvolver as tecnoloxías de
interacción entre o condutor e o automóbil (o chamado programa HMI), para o que
contou cun investimento da Xunta de 1,5 millóns de euros.
- O coche autónomo de Citroën xa realizou unha viaxe de proba en Francia o pasado verán
Vídeo no que podemos ver como é o funcionamento do vehículo autónomo de PSA Citroën