A receita electrónica privada xa é unha realidade no hospital vigués Povisa
mércores, 16 de xullo do 2014
O
hospital vigués Povisa súmase á receita electrónica tamén para
os pacientes privados. Logo do acordo subscrito hoxe entre o
hospital e a Organización Médica Colexial de España (OMC), Povisa
– que emite mensualmente de media unhas 6.000 receitas privadas-
integrou o sistema de prescrición electrónica desenvolvido pola OMC
despois de amosar a súa fiabilidade tras máis de 23 millóns de
receitas amais de estar presente en todas as farmacias, ao ser
desenvolvido en colaboración co Consello Xeral de Farmacia.
Asemade,
os médicos terán plena dispoñibilidade online
de talonarios electrónicos de receitas as 24 horas e os 7 días á
semana, permitíndose o acceso á prescrición só a aqueles doutores
que teñan a certificación profesional do Colexio Médico. Estas
características achegan “un rango de seguridade que ningún outro
sistema achega”, segundo comentou esta semana o director
asistencial do Hospital Povisa, Luís Geremías, que compareceu ante
os medios de comunicación xunto ao presidente do Colexio Oficial de
Médicos da provincia de Pontevedra, Luís Campos Villarino, para
explicar o acordo. Emporiso, “o manexo da información cumpre
estritamente coa Lei Orgánica de Protección de Datos e contémplase
a casuística da sanidade transfronteiriza, de maneira que os
pacientes privados de Portugal poden mercar os seus fármacos nas
farmacias do país veciño coas receitas prescritas en Povisa”. Así
mesmo, os pacientes privados españois de Povisa poden, con este
sistema, adquirir os seus medicamentos en calquera farmacia de
España.
Outra
vantaxe deste modelo é que obriga a presentar o DNI na farmacia e
reflicte o historial das dispensacións para cada paciente, o que
impide a fraude (utilización dunha receita máis dunha vez) e engade
un segundo nivel de seguridade á hora de evitar incompatibilidades
entre determinados fármacos, xa que nese caso o farmacéutico
podería detectalas no seu computador.