Campaña na Rede para que Bing corrixa as deturpacións dos nosos topónimos

O servizo de mapas deturpa topónimos como os de Ferrol e A Coruña

A historia da toponimia deturpada na Rede semella unha enleada sen remate. Non deixa de ser rechamante que se sigan a dar casos desta índole no eido dixital, e en plataformas do máis moderno e innovador, o que nos fai pensar en que de nada serve estar na vangarda da industria web se logo, para ir confecionando as nosas cousiñas e produtos, botamos man de información máis que caducada, moi posiblemente mapas militares feitos nos tempos en que se recibía unha malleira por dicir Pontenova en troques de Puentenueva. O sistema de mapas de Bing, con toda a súa parafernalia, naceu en parte morto. É dicir: ofrecendo información máis que desactualizada, neste caso a toponimia pre-constitucional nos nosos mapas. Así o vén de denunciar novamente a CiberIrmandade.
Para solucionalo, proponlle á comunidade internauta galega facer fronte común arredor dunha causa específica: pedirlles aos de Microsoft, responsables de Bing, que deixen de botar man de cousas que nada teñen que ver nin coa legalidade establecida nin coas normas mínimas de respecto cara aos seus usuarios galegos. A cousa aínda vai a peor, nos recorda a CiberIrmandade, se temos en conta que hai moita xente que consulta estes mapas e que alimentan servizos paralelos como Facebook, onde, de rebote, tamén hai toponimia deturpada a esgalla. “Motivos todos estes dabondo para esixírmoslles entre todas/os que adopten a toponimia correcta tal e como a teñen implementada noutros sistemas semellantes”, sinala a asociación galega. Para participarmos na campaña non hai máis que cortar o texto que se ofrece na nova da CiberIrmandade e introducilo logo no formulario para incidencias do servizo.