Gradiant busca novo xerente
luns, 14 de xaneiro do 2013
O Centro Tecnolóxico de Telecomunicacións de Galicia, Gradiant,
abre o proceso de selección dun novo xerente, que reportará ao director
xeral do Centro e responsabilizarase da elaboración, implantación e seguimento
do novo plan estratéxico, levando a cabo a xestión de recursos humanos e
técnicos, o seguimento do orzamento e conta de resultados e o control de
obxectivos.
O candidato deberá executar a estratexia global de Gradiant, dirixida a
potenciar as actividades de Investigación, Desenvolvemento e Innovación en
colaboración con empresas que sitúen o Centro como referente de excelencia
tanto a nivel estatal como internacional no eido TIC. Entre as esixencias do
novo posto está a experiencia en xestión e dirección de equipos, en redacción
de propostas e xestión de proxectos e en xestión da innovación, formación en
dirección de empresas, dominio falado e escrito do inglés e gozar dun espÃrito
emprendedor, polivalencia, versatilidade, aptitudes de liderado e resolución de
tarefas, co hábito de traballar por obxectivos e cunha clara orientación
comercial.
