Linus Torvalds bota un capote ao Nexus One

Pese a que, tras o estoupido inicial, o Nexus One parece ter problemas para facerse un oco no mercado, non lle faltan defensores, e o último en saír á palestra non foi outro que Linus Torvalds, o pai do kernel de GNU/Linux, quen asegura que habitualmente odia os móbiles, dispositivos que considera irritantes e molestos por interrompelo cando está a traballar ou ler, pero que tras botar un ollo ao Nexus One co gallo da súa última actualización levou unha grata impresión, especialmente polo servizo Google Navigation que «finalmente fai que un móbil sexa útil» e asegura dende o seu blog que co novo terminal ten a impresión de contar cun dispositivo útil no que «o seu uso coma teléfono sería secundario».
Curiosamente Torvalds tivo nos últimos anos varios terminais que funcionaban con Linux, coma o primeiro móbil promovido por Google (o G1), pero neste último caso rematou utilizándoo só para xogar en longas viaxes, polo que resulta difícil de entender o cambio de percepción sobre os móbiles que operan con Android, pois estariamos ante unha simple actualización. Dentro de poucas semanas deberiamos comezar a ver o Nexus One en Europa subvencionado por algunha operadora de telecomunicacións, de xeito que comezaremos a ver outras reaccións ao terminal, para ver se realmente pode conseguir unha posición de peso no mercado ou pasar sen pena nin gloria.