O CITIC achega a súa colaboración nas Xornadas Smart Cities que se celebran en Vigo

O CITIC vén de dar a coñecer que achegará o seu apoio na terceira edición das Xornadas Técnicas Galegas Smart Cities & Communities que se celebran o mes que vén no Auditorio do Palacio de Congresos Mar de Vigo e que, como o seu propio nome indican, servirán para reunir profesionais das TIC e da eAdministración e afondar en cuestións como o potencial e posibilidades das Cidades Intelixentes. A cita será os días 25 e 26 de novembro. Trátase, en palabras do centro tecnolóxico coruñés (CITIC), dun encontro dirixido a profesionais do sector tecnolóxico-dixital, expertos de recoñecido prestixio, empresas líderes a nivel estatal e xestores municipais.
Ao seu abeiro debaterase e profundarase “de forma integradora” en diferentes aspectos relacionados coas novas tecnoloxías aplicadas ao ámbito das Smart Cities, a xestión intelixente dos recursos (tratamento de auga e refugallos, eficiencia enerxética e mobilidade) e a transformación social e urbana que isto implica (Administración Electrónica, novos modelos de xestión dos servizos públicos, modelos de goberno, automatización de edificios, equipamento urbano, medre e planificación das cidades). “Serán dous días”, engaden fontes do CITIC, “para o desenvolvemento de sesións técnicas e coñecer de primeira man experiencias prácticas e exposicións que fomenten as relacións empresariais, técnicas e comerciais”.