O CiTIUS acolle este martes ao creador dun novo sistema de integración humana no eido virtual
luns, 19 de novembro do 2012
O
investigador e profesor David
Glowacki impartirá este martes
no CiTIUS, o
centro tecnolóxico da Universidade de Santiago (Campus Sur), unha
conferencia sobre un innovador
sistema audiovisual interactivo que vén
de presentar publicamente,
el mesmo, no
Barbican
Arts Centre de Londres, no
marco das Olimpíadas
Culturais 2012. O acto desenvolverase este
martes 20 de novembro, ás 12:00 horas.
Natural de Milwaukee (EEUU) o profesor Glowacki traballa como docente
e investigador post-doutoral no Reino Unido, na Universidade de
Bristol.
“Malia
a súa xuventude”, informan dende o
CiTIUS, “ten
publicado xa numerosos artigos en revistas científicas de prestixio
coma o semanario Science, e desenvolveu este proxecto no laboratorio
multidisciplinar Pervasive Media
Studio”.
Danceroom
Spectroscopy (dS) (Sala
de Baile Espectroscópica) é unha nova
ferramenta orientada ó mundo da danza, construída a partir de
algoritmos empregados decote
para simular a dinámica cuántica molecular. “A
partir dunha matriz de ata sete sensores de profundidade
simultáneos”, cóntanos
o centro da USC, “o
sistema rastrexa o corpo humano e traduce a información de maneira
literal, converténdoo nun campo de enerxía; o
resultado desta transformación é a creación dun sistema
interactivo onde o movemento de cada individuo é tratado coma unha
serie de alteracións producidas sobre un campo de enerxía virtual”.
De
maneira gráfica, engádese,
os usuarios perciben esta interacción a través das proxeccións do
seu propio corpo -ou campo de enerxía- sobre unha pantalla,
incrustado nunha simulación de miles de partículas interactivas que
reaccionan perante o movemento. Os datos envíanse asemade a unha
etapa de xeración musical electrónica, que permite escoitar o
efecto sónico producido con cada perturbación provocada sobre o
campo enerxético. Para quen queira
achegarse a este proxecto, de xeito visual, dicirlle
que na rede hai vídeos ilustrativos dispoñíbeis.